Supreme Steak & Grill：鋸扒之樂

自從老婆嘅飲食偏向素食之後，小弟就相對地少食咗肉，唔喺唔食，不過喺比往常較少啲而已。咁當然唔同老婆一齊食飯嘅時候，就會乘機放縱啲。講到純鋸扒呢家嘢，印像中呢幾年真喺食少咗好多，而今晚約咗老死食飯，大家都喺食肉獸，所以一齊嘆番餐鋸扒之樂，故此嚟到深水埗呢間西餐廳「Supreme Steak & Grill」聚聚舊。

餐廳所處位置離地鐵站好近，同埋小弟話晒晌深水埗大，所以好熟呢區，反而老友搞錯咗福榮街同福華街。入到餐廳，一室水泥牆身同天花，無乜太多花巧裝飾，有種簡約工業風，且地方整潔，再者，樓底高，顯出空間感強，慳番啲豪裝，定價可以更大眾化。牆上掛咗大電視，不停播放餐廳嘅菜式，主要都喺各色扒類。

雖然睇餐廳名主打就喺食扒，不過，睇睇啲餐牌，其實都仲有好多選擇，例如：漢堡、烤雞、意大利麵、特色飯、咖哩、小食、沙律、甜品，以及各式飲品、餐酒……等等。

另外，有一系列牛扒套餐，共有7款扒類選擇，定價為$160-$280，正所謂豐儉由人，可以配白飯、意粉、薯條或沙律都得。

仲有另一個晚市套餐系列，8款選擇有漢堡、意粉、扒類，而呢個餐嘅特色就喺薯條任食，但就限時90分鐘，如果客人唔太多，夠鐘都唔會趕你走，只喺薯條無得再添食。以上各樣主食都會奉送汽水或即磨咖啡，最正喺唔收加一服務費，又可以慳多幾十蚊，我哋就點咗兩份扒，「些牙」嚟食！

安格斯級封門柳 $190

封門柳食韓燒時就試過，鋸扒就第一次，所以見到都特別想試試。鋸扒就梗喺要揀五成熟啦，既食到肉質嘅原始味，又唔會生到有血水。200g嘅封門柳估唔到都幾大條，煎封得外層焦香，仲有一條條炭火坑紋，外觀攞足分。切開睇睇，焦脆嘅外層包住嫩紅色嘅柳肉，真喺半點血水都無，師傅煎扒拿捏時間啱啱好，入口肉質非常之軟腍，兼且肉味濃郁，外層有焦脆感，仲帶少少碳火香，沾上黑椒汁，非常之正，絕對喺高質素。

安格斯級肋眼牛扒 $190
另一份就揀肉眼扒，叫得安格斯，質素唔差得去邊，同樣，呢件肉眼亦燒得好靚仔，一條條碳火坑紋絕對可以引起更強食慾。其實，落刀都已感受到嗰份腍滑，入口一樣咁正，肉味香濃，極富肉汁，比起封門柳，佢就有多少少油脂。而薯條喺幼條款式，炸得脆口，甘香而不油膩，可以任食，當然食得更放肆！

即磨咖啡
雖然，汽水配薯條喺最佳拍檔，不過，我哋都想餐後嘆吓咖啡。杯即磨咖啡都幾似模似樣，嗒落又確喺幾唔錯，味道醇香，如果啲鮮奶有加熱到，就更加讚喇。

兩件扒嘅質素，試過之後，大家無庸置疑都讚喺高質嘅，價錢亦算親民，可謂性價比高，服務方面都唔錯，店員會主動收拾用餐完畢嘅杯碟。我哋就覺得可以俾多少少沙律菜，拌啲油醋汁，一來好睇啲，二來又可以平衡番食咁多肉，感覺更理想。

個人評分
味道：8/10
環境：7/10
服務：8/10
抵食：8/10
平均每人消費：HK$190

餐廳資料：
Supreme Steak & Grill
地址：深水埗福榮街161號永邦樓地舖
電話：9880 2237