薩莉亞意式餐廳 Saizeriya Italian Restaurant：抵食「薩」手鐧

原來美孚嘅「薩莉亞」搬咗鋪，由近曼克山搬咗去美孚廣場，都喺搬番去同區，而且更加近我，若非街坊老友報料都唔知搬咗，而之前嘅涮涮鍋就靜俏俏摺咗。因為部份日子在家工作，基本上都晌屋企食晏，喺今日落開街買啲嘢，先嚟「薩莉亞」買啲外賣返去食。

晌等候期間，都稍稍望入去個新場睇睇裝修新簇，光猛闊落，但好靜，好靜。呢個喺放飯高峰時間，唔喺下午茶時段，全場得三幾枱客。同啲店員傾開，停課對佢哋影響最大，平時好多學生哥幫襯，睇見咁嘅場境真喺無奈。

始終買外賣，就無點慢慢影餐牌，而且，都喺快快手買完就走。最終，買咗一客小食、一客意大利麵同一份薄餅，夾埋都唔使90蚊。

原味雞翼 $20

一客有4隻，都屬於大隻嘅雞翼，唔會奀奀瘦瘦咁，而且，又焗得幾夠金香，拎到返屋企，外皮都仲喺幾脆口，又醃得入味，肉質夠滑，無話一早焗定而「乾崢崢」。

甜蝦粗管麵 $30

記得以前都食過，一來粗管麵少食，二來貪佢哋做嘅意大利麵夠汁多，真喺一夾起，黐滿芝士同白汁，焗到面面有啲焦香，而甜蝦亦爽口，整體嚟講一啲都唔失禮。

地中海海鮮薄餅 $36

一個8吋薄餅，就算喺薄批，只賣三十零蚊，仲要咁足料，絕對喺抵到無朋友啦，所以，唔怪得乎咁多學生哥鍾意嚟呢度食嘢。薄批底都帶少少脆口，橫切面一睇，層芝士多到呢，雖然所謂海鮮就只有魷魚同甜蝦（餐牌圖片有埋煙三文魚），但落得一啲都無手緊，無話好將貨就價，亦都幾有鮮甜味。

睇見啲食肆咁冷清清，感覺有啲心酸，希望疫情快啲消失，大家再出嚟消費，幫吓啲商戶。

個人評分
味道：8/10
環境：8/10
服務：7/10
抵食：10/10
平均每人消費：HK$45

餐廳資料：
薩莉亞意式餐廳 Saizeriya Italian Restaurant
美孚百老匯街69-119號美孚新邨美孚廣場平台112A號舖
2271 0733