金域軒 Golden Mile Cuisine：「金」日之選

疫情下，唯一活動就剩番行山，就算行山都好小心，全程戴住口罩行就唔使講啦，亦唔會點約人一齊行，有時一個人，有時就約一個半個相熟嘅行山友，等有個照應。繼好早前行咗一轉金山之後，今次時隔多時，就行轉長少少，由荃灣經元荃古道行到嚟深井，方便離開，而到達深井，就嚟到位處後巷嘅「金域軒」食個下午茶。

由於都喺村屋改成，所以，餐廳室內嘅地方細細，所以，門外亦設有少少露天位。講到防疫，呢啲小店就無乜架喇。

睇番啲餐牌，原來呢度都唔喺咁一般嘅港式茶記，除基本嘅港式之外，仲有啲馬拉嘢啦，越南嘢啦，此外，仲有一版必食推介。

咁既然嚟食下午茶，當然，睇番啲價位較低嘅下午茶餐啦。選擇唔算多，A到H共8款，不過，樣樣都有啲亮點，大部分都喺三十零蚊。

G. 咖映多士、煎蛋、香茅豬扒 + 熱奶茶 $33

作為下午茶餐而言，份量好夠啦，咖映多士烘得脆口，裡面塗滿咖吔醬，清甜得嚟唔算話好過甜；煎蛋煎得好脆邊，蛋黃綿滑；香茅豬扒亦到炸得甘香不膩，肉質好鬆化，三十零蚊個餐真喺抵食。

至於杯熱奶茶就一般般，色澤比較淡，但茶味都勉強算OK，滑度普普通通咁啦，但最大問題喺一嚟到飲一啖，只喺微暖而已，感覺會大打折扣。

純粹行到攰，食少少嘢髷肚，所以，快上快落，食完就散，減少群聚時間。

個人評分
味道：7/10
環境：6/10
服務：6/10
抵食：8/10
平均每人消費：HK$33

餐廳資料：
金域軒 Golden Mile Cuisine
深井深井村67號地下
2496 9776