餐具、口罩袋、薄荷味清水已放晌枱上供客人使用。
再睇睇午餐選擇，主要有兩個餐牌，一個喺全日早餐同漢堡，另一個喺啲主菜類，如意大利飯、長通粉、肉眼扒，兩者都會包餐湯、沙律、牛角包及餐飲，此外，亦有啲額外加配選項，如粗暮條、薯仔沙律；如想試埋自家製甜品，亦有正價減$20優惠。順帶一提，午市唔收服務費，又可以慳番多少少。
餐飲方面，都喺基本嘅茶啡、檸茶、檸水……之類，不過，店家亦有提供多款特飲，如偽鴛鴦、熱拖肥薑鮮奶、特色花茶、竹炭曲奇熱鮮奶，均可以以優惠價轉配。
由於枱上都放咗成本飲品餐牌，尾頁印有各式自家製甜品，所以，索性影埋出嚟俾大家參考。
餐湯、沙律、牛角包 先喺一次過上晒餐湯、沙律、牛角包，我都幾鍾意咁樣，方便我一次過影相，又可以幾樣嘢輪流混合咁食。先分享個餐湯，喺椰菜花忌廉湯，有別於純白色，估計加入咗啲炒洋蔥去打，味道頗香，而且，非常滑溜；啲沙律菜新鮮爽脆好好食，仲加咗少少青蘋果、車厘茄、粟米粒，簡單以黑醋調味，味道醇厚；個牛角包就細細個嘅迷你版，但好酥香，伴湯一流。
班尼迪蛋 $98小弟就想試試班尼迪蛋，平平哋之餘，班尼迪蛋喺好考師傅手勢，而每份班尼迪蛋有兩件水波蛋，仲配有火腿、英式鬆餅、荷蘭汁、香脆薯餅、田園沙律，砌出嚟都大大份，所以，非常有睇頭，賣相亮麗。實際上，水波蛋煮得啱啱好，一切開蛋黃慢慢咁流出嚟，蛋黃極之綿香，火腿亦唔喺茶記啲普通貨色，夾埋英式鬆餅一齊食，都幾正，加上酸酸哋嘅荷蘭汁，味道就更有層次；薯餅雖然睇得出都喺現成貨，但亦烘得好香脆，好有薯香。
炭燒紐西蘭牛肉眼扒 $158舊同學喺食肉獸，所以，最感興趣喺呢一道肉眼扒，大大件肉眼扒炭燒過後，一道道坑紋，再加埋甘筍蓉、香煎薯仔、露筍，配燒汁，賣相同樣誘人吸引，未食都先興奮。要咗5乘熟，一落刀感覺到肉質非常軟腍，再睇睇，色澤嫩紅，卻沒有半點血水，燒得啱啱好；而簡單鹽、黑椒調味，齋食真喺食得到嗰份肉香，加上外層焦脆，內裡好腍滑，足見件扒本身極具質素。而伴菜亦有心思，唔喺一般嘅薯菜，甘筍蓉打得細滑，露筍又喺啲貴價嘢，真喺誠意十足。
熱牛奶咖啡 +$18今回就無選拿鐵，改吓試試熱牛奶咖啡（Flat White），其實，牛奶系咖啡就好啱小弟口味，而杯咖啡幾醇香，又帶少少果仁香氣，如果，有埋拉花睇睇就更好啦。另外一提，杯咖啡仲伴有一小件意式脆餅（Shortbread），佢英文叫「bread」咋，其實佢喺曲奇嘅一類，既鬆脆，又好有杏仁香，伴咖啡一流。
玫瑰抹茶鮮奶沙冰 +$38舊同學就貪得意，試試特色嘢，要咗玫瑰抹茶鮮奶沙冰，淡翠綠色嘅沙冰，唧咗大量忌廉做點綴，都幾靚仔。同學就話入口果然有玫瑰花香，又有啖啖抹茶嘅清幽味，最欣賞喺啲沙冰打得夠細緻，完全飲唔到碎冰粒，呢一點值得一讚。
最後，埋單時，單據放晌個小煎鑊之上，再用粒煎雙蛋磁石攝住，非常得意。此外，原來，仲做緊午餐10送1，晌附近住嘅或返工嘅客人，都幾有吸引力。而且，離開時，先再留意到，仲有好多外賣折扣優惠添。
今餐除咗食物具質素之外，更喺服務熨貼，不時幫忙收走用餐完畢嘅餐具，又會主動提供牙簽，詢問一下啲嘢啱唔啱食，而侍應又非常有禮貌，所以，我哋異口同聲話有機會都會再嚟！
個人評分
味道：9/10
環境：9/10
服務：8/10
抵食：8/10
平均每人消費：HK$155
味道：9/10
環境：9/10
服務：8/10
抵食：8/10
平均每人消費：HK$155
餐廳資料：
Chef's Stage Kitchen
荃灣青山公路荃灣段398號愉景新城1樓1056D&1058號舖
2799 9810
荃灣青山公路荃灣段398號愉景新城1樓1056D&1058號舖
2799 9810
沒有留言:
發佈留言