Brick by Brick：味力「Brick」人

小弟本身都幾鍾意馬來西亞，前後都叫去過3次，次次嘅感覺都幾唔錯，特別鍾意檳城嘅老味道，亦喜歡馬六甲嘅舊建築。對於馬來西亞嘅食物，大多都鍾意，亦好啱口味，最近就一支公放飯時專登走咗去試喇沙，所以，寫番篇食文分享吓。

餐廳嘅名字叫「Brick by Brick」，地址就寫喺士丹頓街，但實際就喺由俊榮里入，因為餐廳位處大廈嘅地庫，入口設晌後巷，入過嚟就知，短短一條俊榮里後巷查實有多家餐廳。

晌呢條後巷嘅餐廳都喺以小店經營，所以，入到餐廳內，地方唔會好大，而目測就大概廿個左右，裝修較西化，一邊磚牆，一邊水泥牆，配以簡單射燈營造一點氣氛。

午餐方面，主打喺馬來西亞喇沙及肉骨茶，但亦顧及其他客人需求，亦會提供其他菜式，就好似今日所見，喺一系列日式丼飯。據店員所講，餐牌都會不時更換，此外，小店不設加一服務費，但就歡迎小費。

餐點已包咖啡或熱茶，但亦可以加錢轉為果汁或其他特色馬來特飲。

秘製馬來西亞咖喱喇沙麵（惹味肥牛堆）$98

以喇沙湯底為基本，可以選配鱻魚、肥牛、炸雞或海鮮，當然，價錢有唔同。小弟就揀咗肥牛堆，果然啲肥牛堆到個小山仔咁，並伴有大量銀芽、豆卜、溏心蛋，金黃嘅湯色非常對辦，店員更強調佢哋唔用味精，全天然，而且，加入大量蔬菜熬煮，增加天氣甜味。

呷一啖湯，真喺好芳香，椰奶味唔會太重，有啲辣勁，但點到即止，唔會太嗆喉。溏心蛋做得啱啱好，蛋黃好綿香軟滑，而肥牛好嫩滑，卻唔會太油，底下就喺摻摻，即喺油麵搭米粉，傳統馬拉嘅食法，份量非常之多，食完好飽肚。

泰式香茅班蘭葉薑茶 +$25
天氣仲喺乍暖還寒，所以，試試呢一杯薑茶，味道頗特別，有點點香茅嘅獨特香味，又滲出一啲班蘭嘅清甜味，帶少少薑嘅辣勁，整體感覺幾得意，飲完就會覺得非常暖身。

睇番自己嘅食評，原來都好耐無食過馬來西亞菜，一食多多少少諗番以前去馬拉嘅旅遊片段，真唔知幾時先可以再出發過一過去玩吓。

個人評分
味道：9/10
環境：7/10
服務：8/10
抵食：8/10
平均每人消費：HK$123

餐廳資料：
Brick by Brick
中環士丹頓街21號地庫
9884 0308