J.Co Donuts & Coffee：「冬」張西望

「J.Co Donuts & Coffee」呢個主打冬甩嘅品牌，大概年半前已經試過，不過，嗰次都喺小組搞聚會，有組員買嚟一大盒共享。最近，行經租庇利街，發現原本中環都開咗家分店，仲見有個配套優惠，趕及限時前幫襯，就趁食晏時間落去買，買嚟晌公司當食個下午茶，試一試。

餐廳呈長形，個鋪都好深吓，而一入門口，左邊喺凍櫃，放置好多冬甩，目測超過廿款，款式多多，琳琅滿目，非常吸晴。

再入少少，晌收銀旁嘅凍櫃放咗數款三文治，因為佢哋都唔止賣冬甩，仲提供其他輕食。

此外，咖啡嘅相關產品，佢哋亦有做零售，如咖啡粉、咖啡杯、咖啡壺……等等。

裡面仲有堂座，裝修簡潔，走悠閒自然風，但因疫情關係，就算無限聚令，為咗減低交叉感染風險，佢哋索性取消堂食，主力做外賣。

臨走時，見有啲單張攞，就索性攞張貼出嚟俾大家參考。原本仲提供特色午餐，飲品亦有好多選擇。

而吸引小弟嘅，喺呢個買黑糖牛奶咖啡，就任選一選冬甩嘅限時優惠。黑糖、牛奶咖啡，本身就喺小弟嘅喜好，加個冬甩，就啱晒作為下午茶啦！但溫提一下，呢個送冬甩優惠，只限買凍黑糖牛奶咖啡或水果茶系列飲品先享用到。

凍黑糖牛奶咖啡 $37

好奇怪一點，晌基本餐牌中，你喺搵唔到黑糖牛奶咖啡呢一款飲品，以為印漏？錯，問店員佢哋嘅回答都喺話餐牌無，都唔好理咁多，啱心水就得。12oz賣$34，16oz賣$37，無理由唔要杯大架。除打入大量奶泡，仲加入唔少黑糖，飲落口感香滑，咖啡味醇香，帶陣陣黑糖嘅清甜，又有陣陣涼意，感覺真棒！

Forest Glam $16（優惠贈送）

以「黑森林」作為設計概念，原味冬甩嘅面面黐滿朱古力針，初時都無為意，原來仲加咗車厘子醬，不過，如果晌冬甩內唧入車厘子醬就更加有賣點。咬落去，冬甩本身都好軟熟，睇見裡面嘅窿窿就明白，而朱古力味都好香濃，算唔錯，但唔會有太多驚喜。

因為一杯啱飲、好飲嘅牛奶咖啡，已為今餐下午茶加分。有時就喺咁，遇到啱心水嘅嘢，就要把握，就去試試，唔一定東張西望四圍搵先至喺好嘅。

個人評分
味道：8/10
環境：7/10
服務：8/10
抵食：8/10
平均每人消費：HK$37

餐廳資料：
J.Co Donuts & Coffee
中環租庇利街1號喜訊大廈地下B號舖
2506 3668