入門口處，有電子量體溫，感覺更精準，仲備有酒精搓手液。店內裝修富特別，天花板陀飛輪裝有，別緻又帶點復古味，而地方寬敞，絕對唔會有密麻麻嘅感覺。我哋被安排坐晌卡位，更感舒服，雖然一旁喺商場嘅行人通道，但加設盆栽阻隔，既美觀，又唔會受路過嘅人影響。
此外，客人嘅手機都照顧到，佢哋特設一部手機消毒機，採用紫外光方式，絕對唔會影響手機性能，3分鐘就搞掂。
餐廳採用電子餐牌，並圖文並茂，更採用二維碼落單，清清楚楚，唔會搞亂晒。而第一版，就喺餐廳嘅簡單介紹，店名源自台灣嘅「大稻埕」（百多年前台北最繁榮嘅貨物集散地，現今為最紅嘅文青區），以台灣直送嘅優質米同滷水嚟做出具「台灣情，台灣味」嘅出品，再回味那份古早味道。
再將餐牌繼續碌，大致嚟講，類別分為台式小食、稻埕風味、蔬菜類、主食、甜品、飲品及酒類。
蜂蜜白苦瓜汁 $38
近排真喺天口熱，所以，同老友都先嚟一杯凍飲降解溫。白玉苦瓜喺台灣特產，再者，苦瓜味小弟一向接受到，所以，點一杯嚟涼快吓。因為加入咗蜂蜜，就更加無苦澀嘅感覺，相反，有種甘甘哋嘅回甘味。
檸檬愛玉 $36
友人就較喜歡愛玉，貪佢滑嘟嘟，而且，配上檸檬沙冰，入口透心涼之餘，更有種清新、醒神嘅感覺，飲幾口，完全驅走晒啲悶氣。順帶一提，值得一讚喺用上紙飲管，為環保出多一分力。
皮蛋豆腐 $52
店家有好多款台式小食，老友話鍾情豆腐，就揀呢一款冷盤前菜「皮蛋豆腐」，雖然只喺皮蛋同豆腐，但加點肉鬆，撒啲蔥花，賣相精緻。豆腐入口冰涼嫩滑，襯上肉鬆、蔥花，味道唔會寡，好啱呢個熱辣辣嘅天氣；而皮蛋彈牙，蛋心軟綿，無嗰陣好似梘水嘅氣味，配埋啲酸薑，就更覺得一流。
九層塔蟹肉炒蛋 $128
小弟都去過宜蘭，三星鄉當然都路經過吓，原打算試試其「北海道帶子三星蔥炒蛋」，不過，店長話剛巧三星蔥缺貨，但可以試吓佢哋嘅「鮮蟹肉炒蛋」，喺上一期嘅招牌菜，唔使拆蟹，啱我喎。
唔喺講笑，睇到，亦食到，師傅落蟹肉一啲都無手緊，啲蟹肉大大梳之餘，又鮮甜，而啲蛋雖然唔喺炒到好似啲滑蛋咁，但一啲都唔老，亦甚具蛋香。
紅燒牛三寶麵 $88
主食方面，都有好多招牌嘢，不過，稍為鍾情台灣嘅牛肉麵。揀三寶麵就可以一次過試勻佢哋嘅 牛腱、牛筋、牛肚。除咗「三寶」，仲伴有紅蘿蔔、白蘿蔔及溏心蛋，大大碗，非常有睇頭。
牛腱好入味，肉質鬆化，牛筋軟腍，卻有咬口，牛肚則爽口，有種彈牙感。而蘿蔔都好清甜，食落無渣。
溏心蛋亦都滷得算有水準，蛋黃半凝，好有蛋香；麵條採用粗身嘅關廟麵，耐浸具咬口，有韌勁，而且，份量十足。其實就咁配啲酸菜食，都覺得簡單而味美。
食牛肉麵就唔可以唔留意佢哋嘅牛骨湯底，一般都會熬得香濃，呢次試嘅亦無甩轆，濃而不濁，醇厚有肉香，飲咗大半碗都無口渴嘅問題。
豆花芋圓仙草 $28
最後來碗簡簡單單嘅甜點作結，芋圓、仙草，夠晒代表到台灣喇啩。仲加入埋豆花、紅豆蓉、地瓜圓，外觀別緻。芋圓好有咬口，豆花、仙草同樣爽滑，紅豆十分清甜，食完透心涼，夠晒解暑呀！
整體而言，「稻埕」所做嘅台灣菜確喺有水準，而且，地方大，環境舒適，招呼又到位，加上唔少增值、貼心嘅服務，喺會加大個印象分，定價以尖沙咀區而言，亦頗合理，值得再訪。
個人評分
味道：8/10
環境：8/10
服務：9/10
抵食：8/10
平均每人消費：HK$205
味道：8/10
環境：8/10
服務：9/10
抵食：8/10
平均每人消費：HK$205
餐廳資料：
稻埕飯店 Dào Chéng Taiwanese Restaurant
尖沙咀河內道18號K11購物藝術館B1樓B105-B106號舖
2668 3300
稻埕飯店 Dào Chéng Taiwanese Restaurant
尖沙咀河內道18號K11購物藝術館B1樓B105-B106號舖
2668 3300
沒有留言:
發佈留言