翰林茶館 Han Lin Tea Room：味道 • 份量 • 一額「翰」！

因為有要事一早過嚟尖沙咀海港城一趟，所以，事先搵咗個地方可以食早餐，打打躉，又想試吓啲未去過嘅餐廳，故此，揀咗由台灣過嚟嘅「翰林茶館」。

由於喺一大清早，隔幾個鋪位又有家「大家樂」，所以，餐廳得我一個客「包場」。其實，如果坐滿人嘅話，實際上喺幾逼吓。從外面已經見到店內地方唔大，但裝修幾骨子企理，最殺食喺對住海景，就算無落地大玻璃，天然光嘅透入，已讓人感覺寧舍醒神。

雖然店名叫茶館，但唔喺淨賣茶飲，亦會提供啲台食，當然，應以茶飲為其亮點。而早餐嘅款式唔太多，初時諗住試試蛋餅，不過，最後見張餐牌嘅粢飯幾好樣，就改咗，當然，實物嚟到就唔喺咁啦。順帶一提，雖然無咩服務可言，但早餐時段都一樣收加一服務費，要留意喔！

粢飯 + 鐵觀音奶茶 $30

好似三文治嘅粢飯，色淡淡嘅鐵觀音奶茶，以木托盤盛上，感覺喺有幾分雅氣。

粢飯

話時話，都好似好耐無食過粢飯喇！有別常見嘅長條圓柱形，而喺包到成件三文治，中間夾咗啲豬肉鬆、榨菜及油炸鬼，睇落好似好多，其實得薄薄一層，味道都OK嘅，不過，男生食嘅話真喺有啲唔夠飽。

鐵觀音奶茶

雖然都喺叫奶茶，但唔好用港式茶奶去比較，根本喺兩樣嘢，唔喺嗰種濃香、幼滑嘅感覺。入口，其實喺茶味淡淡，少少鐵觀音嘅幽香，不過，加咗奶之後，感覺麻麻，只可以講，唔喺自己喜好嘅類型。

本來一心嚟試吓新嘢，但就肯定喺跟預期有好大落差。怪不得，隔幾個鋪位嘅「大家樂」就企住唔少人等外賣，但「翰林」呢，由坐低到食完埋單，過程大概近半小時，喺再多一個客（計埋外賣）都無。

個人評分
味道：6/10
環境：7/10
服務：7/10
抵食：5/10
平均每人消費：HK$33

餐廳資料：
翰林茶館 Han Lin Tea Room
尖沙咀廣東道3-27號海港城港威商場2樓2602號舖
8300 8216