MM Cafe & Lounge：寧靜早餐

行經呢間鋪嘅人都知，佢喺韓星李英愛所開嘅護膚品店，因為鋪外掛咗唔少李英愛嘅相片，然而，店家亦有兼營咖啡店，提供早、午餐，因公事需要早啲返到嚟公司，就索性試一試呢度嘅早餐，然後，再返工。

因為時間早，所以，店內嘅客人唔多。查實，店內嘅環境幾舒服，除咗地方大，枱櫈嘅編排又唔會好密之外，加上柔和嘅燈光，及擺放咗唔少植物，一一都營造出舒適嘅氛圍。

小弟就選近門口嘅單邊位，雖然街景都喺得馬路，但對住偌大嘅玻璃窗，感覺更開揚舒心，正能量都多啲。

以早餐時段計，主要都喺以麵包類為主，走健康路線，亦有提供一款全日早餐，不過，需留意個價錢都喺單點價，並不包飲品，飲品需要另外購買。

而早晨套餐，就只有一款，包牛角、烚日本蛋、咖啡嘅組合，只賣$28，無加一服務費。如想飲其他特別咖啡，亦可+$10去升級。

牛角包、日本蛋、咖啡早餐 $28

一向都明，宣傳圖片跟實物永遠都喺有距離，不過，今次就似乎大咗啲，主因都喺由一個大嘅牛角包，變咗兩個細嘅牛角包。以份量而言，或許差唔太多，但肯定一大個就有睇頭啲。

牛角包

雖然喺細隻咗，但外觀都算烘得金黃，不過，摸上手微暖都稱唔上，感覺會打咗折扣。咬落確喺酥脆，之但喺，就唔算好充滿牛油香嘅感覺，個人認為都只喺屬合格嘅程度。

日本蛋

講到明用上日本蛋嚟做，自不然喺加分位，如果有行開超市嘅朋友，都知近來啲日本蛋都平咗好多，10隻裝往往廿零蚊都可以買到一盒。做烚蛋比較少技巧，最緊要喺用靚蛋，眼前呢隻就夠晒有蛋香。

咖啡

小弟今次只喺飲一般即磨咖啡，並無升級至鮮奶咖啡。然而，杯咖啡飲得出喺用上靚豆，亦喺自己較喜歡嘅味道，醇和幽幽，細味下有果仁嘅香氣。

順帶一提，餐廳鼓勵客人幫幫忙，食完嘢嘅托盤及餐具，麻煩放返去收銀旁嘅收集處。

靜靜哋一個人晌個咁舒適嘅環境用餐，尤其近來疫情之凶，更感安心。雖然，今早所食到嘅早餐，唔算有咩超水準表現，但加埋環境、價錢、店員嘅服務態度，都搭夠俾個中上嘅分數。

個人評分
味道：7/10
環境：8/10
服務：7/10
抵食：8/10
平均每人消費：HK$28

餐廳資料：
MM Cafe & Lounge
中環德輔道中22號地下
3101 4775