悅滿軒 House of Joy：閒情歲「悅」

又喺星期六與朋友行吓山嘅日子，雖然天氣確喺熱，所以，都唔敢揀啲太高難度嘅嚟行，都喺行吓城門、金山一帶，一來熟路，二來長短易控制啲。今回就更專燈順路過埋嚟「饒宗頤文化館」裡面嘅「悅滿軒」嘆下午茶，初時聽到個店名，仲以為喺食中菜添。多年前都曾經嚟過，不過，當時就叫「銀杏館」，嗰次嚟都喺食下午茶。

眾所周知，呢度承接着歷史嘅背景，喺一項活化項目，所以，單喺建築物本身已好特別，真真正正嘅紅磚牆建築，晌香港已賣少見少。走進店內，又喺另一番世界，以白色為主調，配以白色及湖水綠梳化相間，再襯以復古嘅花地磚，感覺時尚得嚟，又有啲典雅感。

嚟得呢度就唔喺趕時間「拿拿淋」食完就走，又或好似茶記咁十幾廿款選擇，喺要享受吓寧靜嘅環境嘅。講到下午茶，明顯喺貴精不貴多，除4款選擇外，就仲有一款類似英式下午茶咁，兩位用。小弟就覺得可以加多一啲配蛋糕、甜點嘅選擇，呢類選擇打卡度高，自然吸引力又大啲。

炸美國雞中翼配藍芝士汁 $68

我哋揀咗兩款中價少少嘅款式，先喺個雞翼上場，當然，收得呢個價錢就唔喺茶記貨色，至少賣相靚仔好多，以木盤盛上，墊張假報紙，再襯啲沙律菜，大大提高打卡度呀！雞翼炸得香而不膩，最精彩喺個藍芝士汁，濃濃嘅藍芝士獨味道，好有個性，沾少少，實在有畫龍點睛之效。

豬肉火腿．布里芝士．意大利麵包配田園沙律 $68

「豬肉火腿」就當然唔喺「長城牌」嗰啲啦，喺凍切肉嗰類，配上布里芝士，選用意大利拖鞋包，烘焗到外層勁香脆，包心仲好軟熟，而溶透嘅芝士，加埋片豬肉火腿，鹹香有層次，喺高級版嘅芝腿治，選料、做法都食得出喺用心之作。

熱咖啡

小弟餐飲就要杯熱咖啡，雖然喺簡簡單單，但睇到好多細節位，先喺套茶杯已經好靚啦，而且，牛奶都喺熱過嚟。未入口都聞到咖啡香四溢，小呷一口先，咖啡都幾香醇，感覺不俗。

餐廳嘅位置對區外人感覺確喺有少少吊腳，加上「饒宗頤文化館」內嘅「翠雅山房」之前被用作隔離營，剛剛開放番，所以，遊人非常之少，正正可以讓小弟更享受嗰份城市中嘅寧靜感，嚟到嘆個下午茶，確喺明智之舉。

個人評分
味道：8/10
環境：8/10
服務：8/10
抵食：7/10
平均每人消費：HK$75

餐廳資料：
悅滿軒 House of Joy
美孚青山道800號饒宗頤文化館H座
9615 5724