黃金冰室 Golden Cafe：不「金」示弱

近來天氣有啲唔穩定，一早約定行山隨時因天雨而泡湯，所以，費事麻煩都無點約人行山。而今次見天氣放番晴，就快閃約咗同區街坊兼老友「夏總」，走一轉由美孚經上長坑村、金山獻郊野公園、鷹巢山，再落返去李鄭屋村。出完一身汗，最正喺涼涼冷氣，嘆個下午茶，地點，就喺李鄭屋附近嘅「黃金冰室」。

隱身晌舊區之內，幫襯嘅都喺街坊客，而下午茶市亦有唔少人幫襯，餐廳亦有做到一定嘅防疫措施。

下午茶時段嚟，就梗喺食下午茶餐啦，不過，除此之外，都仲有個全日餐可以揀。不過，就算兩者夾埋晒，選擇唔算多，但喺，最緊要有啱心水。

菠蘿油餐 $24

上次晌美孚嘅「銀龍粉麵茶餐廳」所試嘅菠蘿油就未符預期，仲要賣到$31，但今回晌「黃金冰室」所試嘅菠蘿油，就絕對喺性價比高。菠蘿包喺平常晌港式麵包店見慣嘅呎吋，唔似「銀龍」嗰啲專登做到咁大個，最型仔喺個包身斜切，插住大大片厚牛油。雖然，個包就無烘番熱，但包身軟綿，「菠蘿」皮好鬆脆，牛油咬落好有油香。

熱奶茶

佢哋嘅熱奶茶亦好有水準，茶底甚香，茶奶比例好，所以，芳香而口感順滑。幾時都話，晌茶記揀熱奶茶，真喺唔衰得去邊。

咁餐廳仲有咩食？臨走時見佢插咗啲外賣單張晌收銀位，順手拎張就掃描埋俾大家睇睇當參考。

今日嘅快閃行山好順，我哋兩個都不甘示弱，兩個零鐘頭就行完，成程上山、落山無點停過。之後，晌茶記又食到咁有質素嘅菠蘿油餐，確喺渡過咗一個愉快下午。同樣，雖然都只喺個菠蘿油餐，一樣都可以不甘示弱，做得出色。

個人評分
味道：8/10
環境：7/10
服務：7/10
抵食：9/10
平均每人消費：HK$24

餐廳資料：
黃金冰室 Golden Cafe
長沙灣順寧道253-263號恆寧閣地下
2816 6016