意樂餐廳 Cafe de Itamomo：我的星期六美孚早餐 ~ 籠「樂」我心

晌美孚區，試過食早餐大大細細嘅餐廳都有近30家，所以，造就咗呢個「我的星期六美孚早餐」系列嘅食評，而當中小弟覺得性價比相對較高嘅喺「意樂」、「MaCafe」及「翠河」。時隔幾個月，疫情緩和咗，就再同老婆落嚟食早餐，當然，就揀咗心水之一嘅「意樂」啦。

環境又喺唔多講喇，因為之前嘅食評都介紹過，走點點工業風。雖然疫情緩和咗好多，但是日朝早嚟到，入座率都唔算好高。

鍾意呢度，除咗嘢食深得我哋心之餘，幾次嘅光顧，都覺得服務唔錯。而餐廳嘅管理，感覺亦幾好，好似依家晌疫情之下，睇餐廳嘅室內環境，就見到到防疫措施甚足，而入門口，已有個資訊牌講講餐廳點樣齊心抗疫，室內周圍更將啲間板貼上防疫「貼士」，增加大家嘅防疫意識。

早餐選擇，對比之前影過嘅餐牌，大致上差唔多，4大版紙，有即製三文治、地道厚多士、忌廉湯粉麵餐、美式早餐、松露之選、意大利蕃茄濃湯、桂格燕麥片……等等，包基本餐飲，睇落就好似無咗轉特飲嘅選項。整體而言，大部分都喺三十零蚊有交易，最平嘅多士餐賣$24，最貴嘅都喺松露之選賣$42，好就好在有晒服務都唔收加一嘛。

煎焗流心蛋喺佢哋嘅名物，其實上次老婆嘅通粉都食過，今次，就輪到小弟揀佢做主角。

鮮野菌‧意式蕃茄濃湯通粉 $28

老婆就一向喺蕃茄濃湯系列嘅粉絲，上次嚟都喺食佢。雞湯底再加入大大殼蕃茄蓉，出嚟嘅效果個茄味都算濃郁，而野菌果然喺新鮮貨，唔喺啲罐頭白菌，所以，菌味突出啲，又香啲，而通粉保持咬口，唔會煮到腍晒。

Double煎焗流心蛋‧蒜香牛油多士 $34

單睇賣相一啲都無hea做，以小煎鑊做餐碟，伴有少少沙律菜，砌到成份迷你輕盈版全日早餐咁款，而配料就4揀2，小弟就揀咗配煙肉、餐肉。

食味就更有驚喜，沙律菜搵啲胡麻醬撈過，煎焗流心蛋都出色，半凝嘅蛋黃寧舍有蛋香；煙肉同餐肉都喺啲平價貨，夾埋啲蒜蓉多士食就更加正。最估唔到，底下仲有一球香草薯蓉，又香又滑，呢個餐性價比甚高。

即磨咖啡、好立克

上次嚟嘅餐飲又喺呢個選擇，老婆話佢哋沖嘅好立克比出面茶記特別濃，而且，可能喺先落水，後加粉，所以，啲好立克唔會黐到一嚿嚿沉晌底。小弟就例牌要杯即磨咖啡，飲落醇香濃厚，好穩定嘅質素。

再幫襯，都喺無失望，仍保持晌小弟心目中，心水嘅美孚餐廳之一。可能疫情關系係，感覺人手好似少咗，上餐時出現咗小插曲，嚟餐飲時嚟咗兩杯咖啡，但跟落單嘅店員跟進，佢一下子就記得我哋落乜，立時換過杯好立克，唔會好似一啲餐廳，可能即時黑面或搵藉口解釋。

個人評分
味道：9/10
環境：7/10
服務：8/10
抵食：9/10
平均每人消費：HK$31

餐廳資料：
意樂餐廳 Cafe de Itamomo
美孚寶輪街1號曼克頓山曼坊商場1樓101C, 104&107號舖
2650 9100