元気寿司 Genki Sushi：壽司「元」味道

是日星期六，陪老婆返公司攞數，出開尖沙咀，就順便食埋晏。自一月尾至今，都真喺無試過兩公婆晌美孚區以外嘅地方一齊食嘢。而日本嘢亦好耐無食過，所以，近近哋嚟到「元氣」，平平哋食番餐廻轉壽司。

餐廳嘅防疫措施都做到足，一入門口量體溫，備有消毒搓手液，又以隔板間開啲位，又或加高卡位嘅椅背擋，務求減低傳播風險。

入座後一切全自助，紙巾、芥末、七味粉、醬油放晒晌枱上，熱水自已斟，就連點餐都可以自助，以手機程式就能夠一手搞掂，清清楚楚，又唔怕有漏單。

蟹肉蟹膏軍艦 $10

小弟一向都頗喜歡唔使自己動手拆蟹嘅菜式，所以，專登點呢一款軍艦。賣10件，抵食喎，因為蟹肉、蟹膏都落得無欺場，確喺食到蟹嘅鮮味，仲加埋蟹籽做點綴並加添口感，整體嚟講值回票價。

帆立貝配日向夏柑橘汁 $17

呢款喺睇到旁邊嘅介紹，元氣新推介，加上帆立貝我都鍾意，所以，試咗一客。

唔喺講笑，件帆立貝真喺堅大粒，色澤晶瑩，睇見都好吸引。而面面放咗紫洋蔥及柑橘果蓉作提味，帆立貝入口口感柔嫩而清甜，味道清爽帶橙香，好啱夏天去試。

蠑螺 $14

啲壽司按自己喜好各自點，老婆嗌嘅蠑螺就一客有兩件，可以同佢一人試一件。螺肉切成薄片，令口感一致，而且，柔煙有咬口，有陣陣螺肉嘅甜味，比預期好。

炙燒黑椒蠔 $10

老婆唔想一次過食得太多生嘢，所以，佢就點咗幾款炙燒系嘅壽司。佢特別點咗呢款燒生蠔，雖然只喺炙燒，即表面辣一辣吓，但感覺已安心好多。佢話隻蠔頗有蠔味，而灑咗啲黑椒粒上面，惹味好多。

炙燒味噌長鰭吞拿魚 $10

雖然話喺炙熱，但睇外觀就好似無乜點燒過吓，哈哈！由於加咗啲味噌、醬油，再放上少少牛蒡絲及蔥粒，所以，老婆話味道多變，但又唔會錯過到吞拿魚嘅油潤香味。

炙燒味噌帆立貝 $17

小弟試咗新推出嘅帶柑橘香嘅帆立貝，老婆亦試咗款炙燒味噌帆立貝。跟上面嘅長鰭吞拿魚好相似，都喺放有牛蒡絲及蔥粒，加上粒帆立貝本身喺有質素嘅，整體食味好好，老婆都讚。

炙芝皇帝蟹柳 $17

一見炙熱，就喺老婆點嘅款式，平時我哋好少食蟹柳，因為，經常遇到啲好溝粉嘅貨式，所以，呢次見佢皇帝蟹柳就搏搏試一試。一客有兩件，我哋大家都可以試到，啲蟹柳嘅質感明顯唔喺勁溝粉嗰啲，唧咗啲芝士醬，又幾唔錯喎。

他他白魚天婦羅 $10

一大件炸白魚柳，沾上沙律醬，冚晒成嚿壽司飯。食落，口感絕對喺炸魚柳配白飯，哈哈！其實味道唔錯，件白魚天婦羅炸得唔油，而壽司飯捏得鬆軟唔會太死實。

柚子醬油吞拿魚 $19

老婆點咗多款炙燒壽司，亦點番款較生嘅壽壽司。雖然睇落呢款醬油吞拿魚壽司紅得嚟好似擺喺櫥窗啲模型咁，但入口吞拿魚頗有魚味，以柚子、醬油醃漬過，食味真喺幾好啫。

野菜天婦羅 $19

之前所點嘅天婦羅壽司幾好，所以，追加一客野菜天婦羅，有兩件南瓜、兩件茄子，前者口感非常粉甜，而後者則十分軟綿最緊要喺一口咬落唔會酒淋淋。

牛油果軟殼蟹卷 $22

最後加多一客壽司卷及烏冬墊肚，牛油果軟殼蟹喺老婆認為嘅心水配搭之一，除牛油果、軟殼蟹之外，仲捲住青瓜，添加埋蟹籽，故此，口感甚富層次，味道豐富。

蒜牛帆立貝烏冬 $29

碗烏冬見佢賣$29，估計都唔會太大碗，份量剛好啱晒我哋兩個「些牙」，卻又唔會太滯肚。雖然只賣廿零蚊，但一樣交足貨，三大粒帆立貝，煎得有牛油、蒜香，而烏冬夠晒滑身，口感卻又帶煙韌，老婆極之欣賞碗烏冬。

晌餐枱上，貼住「日本產米」嘅介紹，所以，前前後後試咗多款壽司或卷物，都食得出啲壽司飯一啲都唔差，黏糯而有米香。

最後，都影影我哋嘅戰績，唔覺唔覺掃咗10碟壽司、一客天婦羅、頂多碗烏冬，對某啲人嚟講唔喺咩嘢，但老婆唔喺大食之人，呢個份量對我哋嚟講算喺食多咗。

埋單都喺二百頭，除咗食到飽之外，更品嚐到唔同嘅味道及有質素嘅食材。總之，能夠食得盡興，就喺幸福嘅一種。

個人評分
味道：9/10
環境：7/10
服務：8/10
抵食：8/10
平均每人消費：HK$107

餐廳資料：
元気寿司 Genki Sushi
尖沙咀加連威老道100號港晶中心地下40-47號舖
2722 6689