吉野家 Yoshinoya：三餸早飯

無論晌屋企，抑或晌街，早餐食得都喺西化啲，大多數離唔開麵包、三文治，再加杯咖啡。不過，今朝就貪得意，一支公嚟到「吉野家」食早飯，都喺聽朋友講佢哋最近有款慢活の朝食「三味盛合」，覺得幾抵吓，所以，就搵個朝早過嚟試試。

疫情下，餐廳都做足防護措施，入門口要量體溫，並備有消毒搓手液。而餐廳裡面主要喺4人枱，為保持社交距離，部份枱被棄用，就算4人枱都被減至二人用。但引發另一個問題，就喺由於少咁好多位，其實堂食客整體都唔多，但都要搵位坐架，所以卻變相被逼搭枱。

早餐時段都有好多選擇，有西式，有日式，不過，重點就講番個「三味盛合」早餐。以三文魚茶漬飯做膽，配和風牛肉或野菜煎雞，再搭溫泉玉子或胡麻豆腐組合成「三味」，配日本茶，套餐價$25。

三味盛合 $25

嚟「吉野家」就梗喺食其和風牛肉啦，所以，小弟就揀三文魚茶漬飯、和風牛肉、溫泉玉子嘅組合，但就改飲咖啡醒醒神。

雖然話喺茶漬飯，不過，單單飲啲「茶」似喺鰹魚湯，齋飲都唔錯架喎。

由於有溫泉蛋，所以，先撈埋落啲三文魚飯一齊食，日本蛋果然寧舍香滑，做成「窩蛋飯」都好正。不過，咁食法啲三文魚比較鹹，所以，都喺做番茶漬飯會平衡啲。

「吉野家」啲牛肉一向都唔錯，都幾腍幾滑，一啖飯，一啖牛肉，算喺一餐奢侈嘅早餐。

熱咖啡 +$2

套餐附送日本茶，如改其他飲品需加錢。雖然唔喺咩靚嘢，但飲落唔喺差喎，始終，你嚟「吉野家」都唔喺一心想嘆咖啡架啦，只喺過過口癮而已。

食完個「早飯」，真心覺得抵，無論食物嘅質素、份量，以廿五蚊而言，真喺交足貨。只喺依家疫情關係，唔可以慢慢hea，食完都匆匆離開，唔好掗住張枱，俾啲位予其他食客。

個人評分
味道：8/10
環境：7/10
服務：7/10
抵食：8/10
平均每人消費：HK$27

餐廳資料：
吉野家 Yoshinoya
中環干諾道中15-18號大昌大廈地舖
2526 8600