東海堂 Arome Bake‧ Drink：包．三餐

一連3日早餐都喺「東海堂」麵包，雖然，走和風嘅「東海堂」一向嘅出品都唔差，但小弟絕對唔算喺佢哋嘅「死粉」。哈哈！今次咁捧場，都只不過因為家中嘅餅券就快到期，換麵包當早餐就好似最划算而已。

橙皮提子合桃裸麥包 $16

今次換咗3款包，其中一款喺「橙皮提子合桃裸麥包」，點鮮3揀佢，一來幾款元素都喺喜愛嘅食材，二來喺新出品，更吸引到去試試。就晌公司襯住杯抹茶牛奶，先試為快。

一袋有3個，個樣好似平常啲細麥包咁，不過，色澤就再深啲，感覺亦墜手少少。咬落，真喺好有一陣陣橙香味，包心內唔算話有好多提子及合桃，然而，包身都做得好鬆軟。

沖繩黑糖合桃提子包 $16.5

另外兩款就留番晌屋企做早餐，睇番個食用日期，一般都可存放3、4日，尤其依家天氣涼涼哋，擺3、4日內食就更安心。又喺提子、合桃嘅組合，其實，都喺因為老婆非常喜歡呢一類包款，加埋黑糖嘅元素，就更合我哋心意。

對比上面介紹嘅裸麥包，切開之後嘅「沖繩黑糖合桃提子包」，質感更綿密，相對提子同合桃食落又多啲，不過，你問喺咪好重黑糖味咩？始終佢又唔喺一個甜包，無話好似飲啲黑糖珍珠奶茶一類咁明顯，但比起用其他糖就更天然同健康啲。

朱古力合桃包 $21

最後一款喺睇見佢嘅包裝特別標明採用100%日本製麵粉及湯種嚟發酵，學過做麵包嘅人都知，要發酵就要落酵母，通常為方便就用乾酵母，但要天然嘅就梗喺用湯種，成本相對高，製作亦較難控制。

啲麵包外觀色澤深啡，有光澤，面頭已經見到鋪滿唔少合桃粒。睇包裝袋背後所列嘅成份，又朱古力膏，又可可粉，怪唔之得入口帶濃濃朱古力味，而且，口感非常軟熟，實在唔錯。

今次唔喺刻意買「東海堂」嘅麵包，雖然所揀嘅3款包都唔喺咩好特別、好特別嘅款式，但款款都好食，又合老婆心水。

個人評分
味道：8/10
環境：7/10
服務：7/10
抵食：8/10
平均每人消費：HK$10

餐廳資料：
東海堂 Arome Bake‧ Drink
尖沙咀天星碼頭KP02號舖
2369 8816