大街：比比「街」是

早輪好興潮式嘅皺皮石磨腸粉，以石磨磨出香滑米漿，即叫即蒸，加上餡料多選擇，一下子好似遍地開花咁，唔少地區都有。最近，美孚都開咗一家「大街」（一邊喺賣石磨腸粉，另一邊喺賣港式小食），呢個鋪位由「萬事達小食」轉到「林昌記」，再轉手到依家嘅「大街」，又唔知可以做得幾耐！

賣腸粉呢邊，理論上晌右邊排隊落單俾錢，再晌左邊排隊等腸粉。睇見近門口有個電動大石磨，旁邊亦浸咗大桶白米，不過，就遇唔上磨米漿嘅一刻。

所有腸粉都喺即點即做，所以，等候需時。只喺製作腸粉嘅爐位檔住晒，睇唔到師傅拉腸粉嘅製作過程，而每份腸粉會附送一兜豉油及辣醬。

如大多數嘅石磨腸粉店，所賣嘅款式多，有齋腸、蔥花、雞蛋、生菜雞蛋、雞蛋瘦肉、鮮蝦、手撕雞、蜜汁叉燒、香茜牛肉、上等蝦米及新鮮豬潤，仲可以額外加蛋、加肉、加粟米。

叉燒石磨腸粉、加蛋 $20

補充一點，小弟喺自㩗玻璃兜落去買，一般情況就梗喺用外賣膠盒載住俾客啦。老實講，小弟對腸粉就唔算有研究，只喺睇過啲雜誌介紹，潮式就做到啲腸粉皺晒皮，似扭麻花咁，食落帶種煙韌感，有別平常上酒樓粵式嗰種講求滑溜感。

份量都幾足，放滿晒成個玻璃兜，叉燒亦算叫放得唔少，當然，為咗影相好睇少少，小弟都揀住多叉燒嘅嚟影。入口米香又唔算好強，然而質感有柔韌性，豉油味就平淡啲，自行加啲純芝麻油就香好多。不過，明明喺加蛋，首先腸粉皮嘅色就唔喺好覺有加，食到尾亦都唔喺好覺有蛋味，但老婆話食到有，即喺有可能啲蛋漿聚埋晌一邊。

口味嘅嘢人人唔同，就算花生醬，有人鍾意食幼滑裝，有人卻鍾情精粒裝。試過啲潮式腸粉，實在未算喺讓人一試難忘，但感覺都叫OK，但小弟都喺鍾意滑溜粵式嗰種。

個人評分
味道：6/10
環境：6/10
服務：6/10
抵食：6/10
平均每人消費：HK$20

餐廳資料：
大街
美孚吉利徑23號美孚新邨第三期地下C號舖