銀龍粉麵茶餐廳 Ngan Lung Restaurant：「仙遊」菠蘿包

由於疫情仲未完全穩定落嚟，始終由歐美入境嘅人士仍然唔少，加上本土就不時見啲無公德、又自私嘅人周圍走，增加播毒風險，所以，呢兩、三個月真喺停晒啲社交活動，連行山都暫停埋，故此，最常做嘅就喺行公園。雖然話喺行公園咋，荔枝角公園又大又好行，是日就趁機落嚟公園曬曬太陽之外，順便到「銀龍」食個菠蘿油，嘆杯奶茶。

雖然呢間「銀龍」開咗好耐，但一直未有幫襯過，因為對「銀龍」嘅印象都喺一般般，所以，無話好大誘因去幫襯。今日嚟到，純粹喺貪方便，加上望入去客唔多。鋪內主要以卡位為主，目測就唔太覺有做「1.5米」距離間隔，不過，卡位就加咗啲擋板增加個阻隔，入門口會主動叫住啲客人量體溫，亦備有消毒搓手液，算做足啲功夫。

因為都喺嚟食下午茶，所以，就介紹吓個下午茶餐牌。底面兩版，有超過50款選擇，有輕食、有沙律、有炒粉飯麵及潮式粉麵。目標喺「鮮油菠蘿包餐」，賣$31。

糖鹽等基本調味品，各種餐具放晒晌枱，自由取用。

熱奶茶

先嚟杯熱奶茶，喺小弟嚟茶記嘅首選，睇落杯奶茶嘅色澤都OK，不過，個人覺得味道就普通啲，唔喺話差，只喺茶底稱唔上芳香濃郁，口感亦無順滑感，整體而言喺不過不失。

鮮油菠蘿包

其實，成日見啲茶記寫「鮮油」，何來會有鮮油吖，依家疫情大流行，美國嗰啲「仙遊」數字就堅喇。呢度嘅菠蘿包比一般晌麵包店見嘅大個好多，都可以叫巨型嚟形容。

老婆餅無老婆，菠蘿包無菠蘿，當然，菠蘿油卻唔會無理由無牛油啦，不過，打開望望，嗰件牛油又薄又細片，專登放晌包邊位，就好似啲寶藥黨氹你落搭咁。雖然啲「菠蘿皮」都好鬆脆，但明顯菠蘿包就無烘熱（或暖住佢），失卻菠蘿油嗰種又熱又凍嘅冰火口感。可能揀佢嘅荷蘭式特製熱狗仲有睇頭。

今次無論奶茶，抑或個菠蘿油，都喺不似符預期架啦，但喺唔喺好失哋望？因為喺「銀龍」，所以，有少少預咗嘅心態下幫襯。小弟一向都唔喺嗰種為杯奶茶，為個包而瘋狂嘅人，既來之，則安之嘛！

個人評分
味道：5/10
環境：6/10
服務：6/10
抵食：6/10
平均每人消費：HK$31

餐廳資料：
銀龍粉麵茶餐廳 Ngan Lung Restaurant
美孚美孚新邨萬事達廣場第七期地下N51號鋪
2742 2226