榮記茶餐廳：隱蔽茶記

之前一篇「深井陳記燒鵝」就提過，一喺十年都唔嚟深井，一嚟就連續兩個星期日入到嚟。呢一篇就繼續講埋下篇，事緣細胞小組搞行山，組內有細路，既唔可以揀太難，亦唔可以揀太長，友人嘅推介，就喺由青龍頭行上深井沉澱塘，再順另一邊落番深井，故此，終點站就喺深井臨時街市。

佢一邊確喺個街市，但檔口唔多，基本糧油雜貨、菜檔、肉檔都齊，而另一邊就喺熟食中心，形式就猶如美食廣場，雖然有7、8檔食肆，但有開嘅就喺一頭（Soul Cafe）、一尾（榮記）及中間（泰好味）3檔。

由於只有榮記有下午茶餐或輕食之類供應，亦喺最划算，所以，大家都贊成揀佢。溫馨提示，留意開鋪時間，星期一例休，星期六、日開到5:00pm啫。

「榮記」喺間茶記，香港嘅茶記精神就喺乜都有，所以，唔再多介紹，一睇鋪面嘅易拉架就知有咩選擇。雖然佢寫住「請先付款後睇號碼顯示牌自取」，當日客唔多，店員直接將食物送過嚟。我哋一棚人，都點咗好多嘢，今次就概略寫啲。

雞扒包 $16

個包就只不過喺普通嘅熱狗包，不過，份量絕對十足，因為送到嚟，件炸雞扒真喺差唔多大過個包，好有睇頭。小弟就無試嘢，友人就超讚，因為，雞扒炸得甘香，外皮好脆口，入口啖啖雞肉，夠晒豪氣。

豬扒包 $16

另一個友人就揀豬扒包，同樣，就咁睇落都好吸引，熱狗包夾住大大件豬包，友人更好有心切開嚟俾我影。佢話啲豬扒口感都頗鬆化，醃得都算夠味。

懐舊西多士 $18

大家正估咩叫懐舊，一切開就知，西多之內喺無餡嘅，即喺唔會搽層花生醬之類。但小朋友就一樣好喜歡食，凡喺呢啲炸嘢一晌都大有市場啦。

紅豆冰 $14

西多配紅豆冰喺友人嘅下午茶不變之選，其實紅豆冰無咩好講，但睇見佢紅豆多過冰，不禁都影低張相留記錄，平常晌快餐店啲茶餐紅豆冰，全部好似都喺星爺教出嚟咁，有幾多冰就落幾多冰，紅豆得嗰兩啖咋。

鹹檸樂 $15

算喺小弟見識少，我成日都以為得鹹檸七，原來確喺有鹹檸樂，唔知味道喺點，都影張相留記錄啦！咁朋友叫得，應該好飲嘅，等下次有機會先試吓。

菠蘿油餐 $17

小弟揀咗食菠蘿油餐，除咗抵之外，就喺好耐無食過菠蘿油喇。由於菠蘿包喺來貨，又欠熱度，所以，感覺都喺差少少，不過，夾有一大片牛油，包身亦算軟綿，風味仍在。至於杯奶茶，茶底喺香嘅，但口感我就覺得未夠細滑。

臨尾，都分享一下今次嘅行山，基本上由青龍頭上到深井沉澱塘，都喺鄉郊車路一條，位處大欖郊野公園邊陲，唯一辛苦少少喺大部分路段都喺上斜，但距離短，一般人行唔會超過30分鐘就到，極之適合唔行開山，又想接觸吓大自然嘅人。上到去，深井沉澱塘就好似個大池塘咁，好寧靜，加上遊人少，感覺非常舒服。

時值秋涼嚟行山，加上條山徑咁短途，所以，大家都覺得輕鬆寫意，之後一齊下午茶，講分享吓軟事，確喺周日好節目，最緊要喺大家俾面願意付出時間嚟參與。

個人評分
味道：6/10
環境：6/10
服務：7/10
抵食：8/10
平均每人消費：HK$17

餐廳資料：
榮記茶餐廳
深井深井街市熟食中心1號舖
2491 9740