點解友人極力推介，原來店主本身做咗幾十年海鮮批發，揀手海鮮嘅貨源一定足。此外，餐廳主要做蒸氣鍋，4種唔同價位嘅套餐，起跳價都喺$298（星期五、六、日及公眾假期額外加$28），已包8款高質素海鮮，性價比高。其次，仲有$398、$498、$688嘅價位，正所謂豐儉由人。
若然擔心套餐嘅嘢食唔夠飽，又或有其他火鍋嘢想試，佢哋仲有一大堆配料可以散點加配。
而飲品方面，汽水、啤酒自然有得嗌，但紅白餐酒一樣有得供應！
醬油費 $10
翻睇返個餐牌都唔覺有寫，都喺事後晌張單先見，感覺唔喺幾好，再者，醬油其實只喺得豉油、蒜蓉及辣椒碎而已。
我哋都哋平平哋揀$298個餐，隨即，捧上兩大份海鮮，包括越南頂角膏蟹、澳洲青年龍蝦、翡翠九孔鮑魚、日本大元貝、越南貴妃蚌、泰國海中蝦、深海龍躉片及紐西蘭青口，非常有氣勢。店員仲話啲海鮮喺新鮮劏，有落單先劏，唔會為減省時間一早劏定。
蒸汽鍋呢個玩法唔使我再多介紹啦，晌香港都已經興咗一段長時間，而呢度就逐樣蒸，由店員專人負責幫你放食物去蒸、計時，基本上全程就淨喺食。由於佢哋無提供一個建議蒸食物時間表俾客人，除非，你好有信心知啲嘢食蒸幾耐，否則都喺要等佢嚟搞，個人就覺得煩到佢哋，又嘥咗我時間等。
一開波，例牌搞定個粥底先，好快已見店只將米粒、南瓜粒、排骨放晌鍋底，等啲蒸汽慢慢熬。
紐西蘭青口、泰國海中蝦
相信咁多款海鮮，以青口喺最平嘢，不過，都喺每個客人得一隻，略嫌唔夠大方。但掉轉講，相信好多人對食青口都喺可有可無（除非比利時或法國青口），俾少啲都唔介意。其實，啲青口都唔差，蒸熟之後唔會好似擦紙膠咁韌，亦有啲鮮味。中蝦每人「配給」兩隻，蝦頭有唔少膏，而啲肉亦鮮甜爽口，雖然只得兩隻，當喺少食多滋味，反正靚海鮮陸續有嚟。
深海龍躉片
雖然龍躉片喺貴價貨，不過，我哋得兩個人，放兩片魚片落去蒸，有啲失勢。講番啲龍躉片，入口確喺嫩滑，魚味濃，唯可惜一片真喺唔夠喉。
日本大元貝
由於店員話今日嘅大蟶子返貨唔靚，所以，只供應大元貝。啲元貝果然好大隻，色澤睇落都好新鮮，唔會瘀瘀黑黑。味道真喺唔錯，好鮮甜，帶子位好彈牙。
越南貴妃蚌
輪到貴妃蚌，阿姐就教我哋將蚌內嘅海鮮汁倒埋落啲粥度，等個粥更鮮甜，我哋就倒是半，就咁飲另一半，咁先真正嗒到嗰份鮮。蚌肉蒸得啱啱好，所以，柔韌有咬口，無過火。
翡翠九孔鮑魚
啲九孔鮑唔喺好大隻，但勝在都夠鮮，亦有鮑味，口感咬落有韌勁之餘，亦有彈牙感，沾少少豉油味道更鮮。
澳洲青年龍蝦
亮點之一出場，店長就話佢哋啲澳龍喺野生貨色，老實講，小弟就唔喺好識分，但睇到啲肉晶瑩有光澤，覺得都唔會喺下價嘢。啲龍蝦肉唔止鮮爽，又厚肉，更有唔少蝦膏，拆起啲蝦肉大啖放入口，真喺爽呀。
越南頂角膏蟹
專登將店名改為「蟹仙」，蟹就梗喺佢哋嘅賣點，我哋就壓軸先嚟食佢。講到蟹，店長就有好多蟹知識分享，讓小弟長唔少知識。
我哋兩個都想試頂角膏蟹，其實，可以膏蟹、奄仔一樣一隻都得。其實，呢啲頂角膏蟹喺蟹乸嚟，所以，一定爆晒膏，不過，相對啲奄仔嘅膏，就會實淨啲，卻喺別有一番滋味。此外，白滑嘅蟹肉就實在鮮甜，蟹嘅質素確喺高質。
有機蔬菜籃
食完晒啲海鮮，店員就奉上一蔬菜籃，有南瓜、粟米、娃娃菜及生菜，南瓜同粟米就最正，前者夠粉香，後者好清甜。
南瓜排骨粥
最後，就以南瓜排骨粥作結，雖然唔算好綿，仲要補多少少上湯煮多陣，但算集合上述海鮮滴下嘅精華，所以，個味道真喺無得點輸。
椰汁燉雪燕
食完晒所有嘢，尤其最後一人頂兩碗粥，夠晒飽，點知同場加映送糖水，唔喺紅豆、綠豆，食落似喺椰汁雪燕，夠晒誠意啦，如果熱啲就仲好。
整體嚟講，有多款海鮮都食得出具質素，用料亦有番咁上下，此外，起跳價屬低位，連加一都喺三百頭，就已經食到8款海鮮，絕對玩得過啦。溫馨提示，餐廳暫時只收現金，將來會唔會加其他支付方式就唔知喇。
個人評分
味道：8/10
環境：7/10
服務：8/10
抵食：8/10
平均每人消費：HK$340
味道：8/10
環境：7/10
服務：8/10
抵食：8/10
平均每人消費：HK$340
餐廳資料：
蟹仙
九龍城龍崗道2-4號地下
2360 9718
蟹仙
九龍城龍崗道2-4號地下
2360 9718
沒有留言:
發佈留言