仲有一啲小區域，自成一角，擺到3、4張枱，我哋成十多人，正正安排呢啲用餐區域，一字長形拍晒啲枱，成個空間就好似喺我哋嘅獨立個室咁，又巧妙用全身鏡嚟增加空間感。
上文都講過啦，佢哋嘅菜式選擇多，單喺個冬日套餐都睇到你眼花，其實，嚟嚟去去都喺2人或4人套餐，只不過有多種級別定價，每個套餐又有好多種配搭而已。
此外，時值冬季，自不然加入季節限定嘅「冬之鍋」特集。
由於我哋人多，大家又唔嫌煩，就一於散點，揀啲心水菜式。況且，喺啲媽咪先知佢哋嘅細路口味嘛。影餐牌都有排影，同樣又喺花多眼亂，唔多講，自己睇圖啦。
海老牛油果沙律 $58
顧名思義，個沙律除咗有沙律菜、燈籠椒、青瓜及車厘茄外，就仲有凍蝦及牛油果，色彩繽紛醒神，而醬汁另上，方便唔同人對醬汁嘅需要，而味道有啲似千島。整體味道幾清爽，啲食材亦頗新鮮，喺一道唔錯嘅開胃沙律。
和民健康照燒雞肉沙律 $68
相對嚟講，大家就偏愛呢一款沙律，相信一來因為有照燒雞粒，惹味啲，二來淋上日式胡麻醬，令味道濃香咗，可以講喺變得色香味全。
加州卷 $58
常見嘅加州卷多數都喺將牛油果捲入其中，但依家牛油果成為大熱食物，健康有營，加上吸晴嘅翠綠色，「和民」嘅加州卷索性將佢變成「主角」放上面，裡面就捲住蟹柳、青瓜絲，味道不俗，喺嫌啲飯爛咗少少。
鮭魚牛油果卷 $68
既然牛油果咁有益，就再下一城點多客有牛油果搭三文魚做主角嘅卷物，同樣裡面都喺捲住蟹柳及青瓜條，面頭就放上牛油果及薄薄嘅三文魚，入口柔香軟滑，若非啲飯差咗少少，呢款卷物肯定俾佢90分。
壽司卷盛 $108
本應一客卷盛有齊火炙三文、帶子、芒果、三文魚及燒牛肉共10件壽司卷，不過，燒牛肉未有貨，咁就梗喺揀帶子嚟代替啦。色澤鮮艷，不過，啲飯粒切到甩晒，唔齊口，賣相要扣分。整體而言哋，食材嘅味道鮮，尤其啲帶子，厚肉鮮甜。
和風煙肉、雜菌批薩 $48
咪見佢啲薄餅賣48蚊咁平，其實，直徑大概8吋，仲喺薄批，就算一個人食晒都濕濕碎，但勝在可以試到多啲唔同菜式。個批本身做得唔差，薄身脆口，夾雜啲煙肉同雜菌，加埋啲芝士，鹹香不俗。
照燒雞肉批薩 $48
而照雞雞肉就相對惹味多啲，配薄餅，一樣唔錯，尤其啲雞肉又無話焗到「嚡霎霎」，啲照燒汁又香濃，夾芝士，掂喎，所以，呢道菜我哋亦有「安哥」。
北海道名物！十勝豚肉盒子飯 $78
個名講到咁明，重點就梗喺啲豚肉啦，難得有好多豚肉鋪晒晌飯面，真喺無欺場，而且，啲豚肉有啲質素喎，軟腍有肉香，咬落去唔會唔知自己食緊咩肉。
滑蛋豬柳盒子飯 $68
個豚肉飯做得唔失禮，咁個豬柳丼又點呢？大大塊吉列豬柳，算得上鬆化，不過，滑蛋就變咗熟蛋，而飯底嘅珍珠米俾起做壽司卷嘅飯底好好多。
石鍋黑椒牛肉飯 $58
最後，再追加多一客飯、一客拉麵。啲牛肉喺生牛肉，以石鍋嘅熱力逼熟，所以，啲牛肉頗為嫩滑，再將啲飯撈勻，底下有些微飯焦，又幾好食喎。
豚骨醬油拉麵 $78
以豬骨湯加入醬油為賣點，估唔到又唔太差啫，湯頭嘅豬骨味幾濃郁，而麵條唔喺話好爽，叉燒亦偏肥，最正應該喺隻溏心蛋嘞！
咪睇我哋唔喺點好多嘢，其實，分段點，有啲好食嘅翻兜再點，似乎最開心喺啲細路仔。「和民」啲嘢唔算好高班，亦唔算差，仲偶有意外收獲添，而且勝在花款多，定價又唔算貴，可以一次過試到多啲嘢食，食飽飽，喺時候出發起行喇！
個人評分
味道：7/10
環境：8/10
服務：7/10
抵食：8/10
平均每人消費：HK$90
味道：7/10
環境：8/10
服務：7/10
抵食：8/10
平均每人消費：HK$90
餐廳資料：
和民居食屋 Watami Japanese Casual Restaurant
太子彌敦道750號始創中心地庫B01A,B10-12及B14號舖
3167 7426
和民居食屋 Watami Japanese Casual Restaurant
太子彌敦道750號始創中心地庫B01A,B10-12及B14號舖
3167 7426
沒有留言:
發佈留言