近門口左邊，有啲卡位，特色在於有通花屏風間起晒，變相多咗少少私隱，減少受騷擾度，人唔多嘅話喺上佳靚位。
睇餐牌面面嘅餐廳名，已標注咗「京川滬」，所以，食咩菜系唔使多講。
原來，「稻成」喺四川西南邊嘅一個地方，有「香格里拉之魂」嘅稱號，仲話喺風光如畫、世外桃源添，有機會真喺要去吓。
翻一轉就知菜式選擇甚多，種類由涼菜、肉類、海鮮、豆腐蔬菜、招牌水煮、湯羹、點心、麵飯、甜品，以及飲品、酒類。
太多選擇，唔知點揀好嘅人，簡單啲就不妨晌套餐度落手，佢哋有啲2、4、6人套餐。不過，最後我哋都喺散點，自主啲。
前菜 $15
先上嚟一小碟大豆芽，幾爽口，有少少辣勁。餐牌有注明，如果唔要前菜，喺可以向店員提出。順提一提，茗茶就每位收$6。
雞絲拌粉皮 $48
除咗啲前菜，都想點一客冷盤過吓口癮，雞絲、青瓜絲及粉皮均切得工整，跟麻醬拌勻，已經喺個好配搭，而且，芝麻醬好香濃，粉皮又軟滑，青瓜加添爽口感，好食。
稻成小籠包 $42
標準嘅一客4個，小籠包摺紋平均，外皮搓得夠晒薄，咬開就見，而肉饀鬆化唔帶肥肉，又富肉汁，確喺做得有水準。
弄堂蔥油餅 $36
蔥油餅食唔少啦，但無論賣相、做法，「稻成」嘅蔥油餅都甚有特色，做到成個環形，中間填有唔少香蔥。入口外皮頗為酥脆，蔥香滿溢，口感有別平常所食嘅滬式大大件蔥油餅。
炸饅頭 $28
好耐無食過炸饅頭喇，見平平哋廿零蚊一客，點一客過過口癮。啲饅頭一睇就知炸得金黃，一咬甘香十足，內裡好軟綿，沾少少煉奶，非常好食。
孜然寸骨 $88
親友喺無肉不歡一族，點都要有一客全肉俾佢。每支寸骨都大大件，沾滿孜然粉，燒得香，入口肉質好鬆化，食得一口孜然香味，不過，如果本身對孜然呢種香料味唔啱，就千祈唔好點，因為都幾重口味。
雪菜毛豆百頁 $72
喺幾傳統嘅上海蔬菜菜式，百頁喺啲豆製品，味道偏淡口，但加上雪菜嘅鹹香味，拍埋一齊就變得啱啱好，而且，有上湯墊底，整道菜一啲都唔寡。
酸辣湯麵 $62
麵飯都有好多選擇，呢道酸辣湯麵既有酸辣湯飲，又有上海拉麵食，前者酸辣度啱啱好，唔會太嗆喉，後者麵條拉得有韌勁。
高力豆沙 $48最後，來一客高力豆沙作結，每個都做得漲卜卜，外層灑滿糖霜。雖然只有豆沙，但內裡填得滿滿，味道清甜不膩，外皮又鬆軟富彈力喎，讓今餐晚飯有個美味結束。
因為我哋被安排晌卡位，餐後亦可以繼續無乜騷擾下傾偈，但店員都好醒目，都幫忙收拾好枱上用餐完嘅碗碟，整體服務都好貼心到位，食物有一定質素，定價又唔太高，值得翻兜再嚟。
個人評分
味道：8/10
環境：8/10
服務：8/10
抵食：8/10
平均每人消費：HK$170
味道：8/10
環境：8/10
服務：8/10
抵食：8/10
平均每人消費：HK$170
餐廳資料：
稻成京川滬 Dab-pa Modern Chinese Cuisine
葵芳興芳路223號新都會廣場4樓413-416號舖
2330 8322
稻成京川滬 Dab-pa Modern Chinese Cuisine
葵芳興芳路223號新都會廣場4樓413-416號舖
2330 8322
沒有留言:
發佈留言