Ulyssa by Aldou：獨廠滋味

2015年年尾光顧過元朗嘅Aldou Café，知道佢哋雖然喺家小咖啡店，但做菜有水準。早前，知道佢哋跳出元朗嚟到荔枝角廠廈開店，地點就晒我，故已好想嚟試吓。趁老婆有局，費事約人一支公摸上門，獨闖「Ulyssa」食餐晚飯。

億利工廈越嚟越多餐廳進駐，小弟亦唔喺第一次嚟搵食，所以，都幾熟「架步」。踏進「Ulyssa」，跟廠廈公眾環境好唔同，一室燈光柔和，甚有氣氛，兩旁放上木枱木櫈，中間留有闊落嘅通道，又晌唔同位置放上適量嘅植物，都予人感覺悠閒。

餐廳尾一張共享大枱，獨個兒坐晌度，特別有文青氣息，若果6、7個人嚟，一樣夠坐。

由於餐廳內嘅燈光較昏暗，所以，影出嚟嘅餐牌亦較暗，再者，餐牌嘅字粒頗細，老花嘅朋友睇起嚟就會吃力啲喇。第一張嘅晚市餐牌，印有前菜、沙律嘅散點選項；其次，就喺意大利麵、意大利飯、漢堡及主菜嘅套餐，由於選擇唔少，故價位比較闊，配餐湯+餐飲或甜品，餐飲亦有指定，但可選擇加錢揀其他飲品，不過，由於餐飲、甜品只可當二揀一，如可以額外加錢可選齊兩樣就更有彈性喇。

第二張餐牌喺另一款晚市套餐，點解喺另一款，因為喺二人套餐嚟，包前菜、餐湯 x 2、意大利麵 / 意大利飯、主菜、餐飲 / 甜品，定價$498 +10%，但揀選部份主菜還需額外加錢。

最後一張餐牌就梗喺飲品名錄啦，主要喺咖啡、沙冰、梳打、茶品、朱古力，以及特色甜品。

野菌湯、彼得包

是日餐湯喺野菌湯，個湯頗有菌香，入口順滑，只喺口感有啲稀；伴湯嘅餐包喺彼得包，翻烘過所以拎上手微暖，沾點油醋，又飲啖湯，喺輕怡嘅前奏。

低溫慢煮美國穀飼豬鞍架配菠蘿黑莓汁 $198

豬扒類中，以豬鞍最得我歡心，依道豬鞍架賣相花咗唔少心思，將豬鞍架斜切成小件，令擺出嚟更立體唔單調，又放咗唔少裝飾物增加個美觀感。

豬鞍本身嘅肉味唔會好濃，但特色在於質感有啲脆口，加上先以慢煮處理過，肉質就更嫩，煎香後咬落有脆脆哋嘅感覺。再蘸點菠蘿黑莓汁，酸酸甜甜，啲豬鞍肉本來就唔肥膩，所以，襯上啲汁醬就更有酸爽。

配菜亦頗特別，墊底喺紫薯蓉，做得十分幼滑，此外，仲有紫椰菜、椰菜仔、秋葵相伴，整道菜式由用料及烹調手法都好用心。

套餐嘅甜品並非指定款式，而喺可以晌出面嘅餅櫃任揀一款，走出去睇睇，竟然有成10款之多，好幾款都喺特色嘅甜品，所以，喺小弟揀要甜點嘅主因。

蛋白檸檬撻

初時以為套餐關係，會就咁將件撻放上碟就奉客，好意外喺以長形木板碟，仲以朱古力漿、焦糖漿、奇異果漿、乾花碎……等等裝飾得好靚仔先登場。

然而，唔止好睇，仲好好食，下層啲檸檬餡心酸香柔軟，檸檬味極之清爽，撻殼入口鬆化富牛油香，面層嘅焗蛋白軟綿綿，猶如棉花糖般輕柔。

走入廠廈時，見到有位阿姐正正派緊「Ulyssa」嘅單張，主要喺宣傳午餐，但可能新張關係，做緊88折添，午餐晚餐都可享用，又可以慳番啲先。

環境舒服，服務亦好唔錯，食物又做得有水準，定價都合理，驚喜位喺甜品並非普通慕絲或布甸嘢。套餐如可額外加錢配飲品或甜點就更好喇。

個人評分

味道：8/10
環境：8/10
服務：7/10
抵食：8/10
平均每人消費：HK$195

餐廳資料：
Ulyssa by Aldou
荔枝角長沙灣道883號億利工業中心2樓203室
2488 0833