Crema：啡同小可

每個月第一個星期日都要出一出尖沙咀聚會，嚟到食晏時間，本來就番老婆去尖東嘅「Vegetarian Kitchen by Dickson Yoga」食健康餐，點知原來已經唔再做星期日，可見靜到都費事開鋪嘥時間。結果，走返過嚟尖東噴水池呢邊搵搵有無啱心水，就隨意撞上間「Crema」。

雖然已到食晏黃金時段，但餐廳內都好少客，計埋我哋都喺5、6個客左右，故此，環境顯得更寧靜，讓我哋坐得更輕鬆自在。而環境設計簡約，大部份都喺木枱配上藤椅，又有啲仿磚牆，感覺閒適。

雖然走咖啡店路線，一系列咖啡故然選擇多多，但原來食物款式亦唔少，有意式三文治、沙律、蛋糕、意大利麵、薄餅……等等，而且，睇落全部都定價相宜。臨走拎咗張單張，貼出嚟就一目了然，唔使晌餐牌逐頁影。

此外，佢哋亦提供早、午、晚市套餐，當然比起散點划算少少。而是日午餐嘅餐牌，共有5款選擇，定價$41-$50，包一杯基本餐飲，可加配餐湯，有侍應招呼，但就唔收加一。

牛肝菌湯 +$8

見個餐湯喺牛肝菌，仲只喺加$8，無理由唔試吓嘅。雖然只得細細一杯，但質感滑溜，菌香濃郁，真喺一啲都唔失禮。

烘脆吞拿魚沙律意大利包配蘋果沙律 $45

老婆揀吞拿魚沙律包，純因為佢唔食紅肉，呢款就啱心水多啲。而呢款包喺採用另一隻意大利三文治「拖鞋包」（Ciabatta），口感特別軟熟，卻又帶點煙韌感，內裡放上厚厚嘅吞拿魚沙律，再夾一片青瓜，味道不俗；不過，略嫌伴菜嘅蘋果沙律落得太多沙律醬，影響外觀及食味。

烘脆煙火腿芝士扁三文治 $45

小弟就揀咗扁三文治包（Panini），將長形嘅包身斜切砌成心形，算幾有心思。不過，只放片蕃茄加幾粒粟米，就有少少虎頭蛇尾嘅感覺，之但喺，比起晌星巴克買件包，算多咗啲配菜喇。件扁三文治壓烘過，可以講喺外層內軟，而煙火腿拼芝士，提升惹味感，更畫龍點睛嘅喺醬汁用咗類似蜜糖芥末一類，帶微微芥末嘅辣，味道唔單調。

橙汁、鮮奶咖啡 +$8

老婆要橙汁，當然無期望過會喺鮮榨，不過不失咁啦。小弟就加錢試試鮮奶咖啡，始終佢哋喺咖啡店，咖啡喺主打產品。先講賣相，小白兔嘅拉花，花紋細緻工整，細節位又做得足，呢方面搶唔少分；而呷一口，咖啡味好醇香，口感平衡，飲到尾，奶泡跟濃縮咖啡都無失衡感。

以咖啡店嚟講，食物選擇多，水準亦不賴，招呼又有禮，唯改善空間仍有，例如菜式嘅賣相，可以做得靚仔啲、配菜加多少少以增加立體感。

個人評分
味道：8/10
環境：8/10
服務：7/10
抵食：8/10
平均每人消費：HK$55

餐廳資料：
Crema
尖沙咀加連威老道96號希爾頓大廈低層LG17
2369 0338