裝修簡約得嚟，又花咗唔少裝飾晌佈置上，如乾花花糟、別緻掛牆鐘、小銅像、食譜、茶壺……等等，都喺叫人感到有種家庭式小店嘅感覺，氣氛輕鬆。
烤麵包配蕃茄莎莎（免費）
好多時啲意大利餐廳都會奉送少少意大利香草包配油醋作餐前麵包，但估唔到呢度就提供以薄餅粉糰做成嘅烤麵包，更配上蕃茄莎莎，麵包烘得熱熱，蕃茄莎莎酸香鮮活，食過真喺產生開胃之效。
翻翻餐牌，類別齊全，包括前菜、湯品、意大利麵、薄餅、主菜、甜品，菜式選擇頗多，大抵因位處深水埗，定價亦相宜。
而且，正值新張，仲喺唔收加一，兼俾多個九折添，食意大增。故此，今晚同老婆、姨仔嚟食飯，食咗好多嘢，落樓都唔使六百，抵呀！
以一家小店而言，前菜選擇十分之多，一共有成14款，款式亦夠晒多元化，有平有貴，悉隨尊便。
野菌醬蒜香意式烤麵包 $38一客有6小件，每件麵包都烤得香脆而充滿蒜香，其上嘅野菌醬口感好豐厚，兼且好有菌香，食多兩啖，原喺加咗黑松露醬，唔怪得咁幽香；此外，個醬做得細綿，口感柔軟。平常多見放啲沙律菜或翡翠苗襯托吓，呢度就用上魔豆莖（Beanstalk），確喺有誠意。
意式千層茄子 $56
有啲癲覆小弟對意式焗茄子嘅印象，唔喺以焗盤上，而喺做成一小口嘅模樣，賣相精緻咗。味道又如何？一整件放入口，口感軟腍，茄子焗得啱啱好，跟芝士、肉醬，一層疊一層，又下咗好多鮮蕃茄醬，香濃好食。
意大利雜菜湯 $58
老婆一向好喜歡飲湯，索性點3客湯，尤其有意大利雜菜湯，就更加啱佢。對上一次，佢就好欣賞荃灣「Chalet」嘅出品，今次就有啲唔同，跟平常見嘅「紅色」雜菜湯有別，而喺帶啡黃，底下加咗香草醬嘅版本，但同樣混入大量蔬菜及豆類，口感豐富，極之飽肚。
香燒南瓜蟹肉湯 $68
姨仔就選南瓜湯，湯色鮮橙有光澤，放上一抹忌廉泡沫，喺有心思嘅做法，而蟹肉亦放咗唔少。小弟小試一口，南瓜湯口感順滑，南瓜味清甜濃郁，有別落咗「麵撈」嘅忌廉湯做法，而蟹肉未知是否鮮拆，但味道鮮甜，喺誠意之作。
每日精選廚師餐湯 $48
除以上兩款固定湯品之外，每日仲有一款「是日餐湯」，今晚嘅就喺白豆煙肉湯，淺啡色嘅白豆湯，入口滑溜細緻，完全無豆渣嘅感覺，有輕輕嘅豆香味，慢慢再滲出煙肉嘅燻香味，做法細膩。
主食方面，店長特別推介其薄餅及意大利麵，皆因兩者均喺自家手製，有信心做得出色。而手製意粉共有9款，款式都比平常所見較特別，如手扭麵、寬帶麵之類，故此，點咗一款寬帶麵俾老婆試試，小弟就曾經晌堅尼地城嘅「Little Creatures」試過呢種意大利麵，覺得非常特別。
野菌牛肝菌寬帶麵 $158
寬帶麵跟寬條麵厚薄差唔多，但闊度有兩隻手指闊，極具咬口，帶點煙韌；除野菌，仲加埋牛肝菌，而「含菌量」高，所以，菌香四溢，就連帶啲寬帶麵都好入味，因為個味道實在好濃，一個人食可能重口味得滯，兩三個共享就最好喇！
另一方面，主打嘅手製薄餅亦有5款供應，雖然唔算多，但配搭都以靚食材行先。
煙三文魚露筍薄餅 $138
本來想點純素嘅瑪格麗塔薄餅俾老婆試，但佢反而話想食煙三文魚露筍薄餅，呢度嘅薄餅以長形製作，以木板盛上。批面平均鋪上好多煙三文魚，鹹香油潤，更無過鹹嘅情況；露筍亦採用BB露筍，鮮嫩無渣；其次個薄批底食起嚟帶點脆口，又滿滿香濃嘅芝士，整體而言，真喺幾好食。
呢度嘅甜品選擇非常之多，有成近10款，但因為食完上面嘅菜式，大家都頗飽，所以，就只點一客甜品淺嚐。本來好想點香蕉核桃拖肥忌廉批，但店長話今日啲蕉來貨未夠熟未夠靚，怕影響效果，所以，無供應住，唯有試試其提拉米蘇先。
提拉米蘇 $58
賣$58而言，感覺喺細件咗啲，但味道具水準。雖採用蛋糕餅底，但浸得夠透，口感濕潤，既有咖啡香，又有酒香，而酒香有陣陣甜味，事後先知原來加咗啲百利甜酒，跟用冧酒所做嘅感覺好唔同。上層嘅馬卡風芝士打得十分柔滑，口感細緻，拼上埋啲唂咕粉，非常好食。
因為小弟間唔時都會嚟開深水埗，故問問佢哋午市有無套餐供應，午市睇落都幾划算，包沙律或餐湯，主菜有8款選擇，由意大利麵、薄餅到扒類都有，包餐飲，亦可加錢升級，定價都只喺$68-$128，唔介意俾多少少錢食啲高質素嘢，都喺個唔錯嘅選擇。
食物果然有水準，而且，食得出用料不頗；另一方面，招呼好好，待客有禮，例如，上菜有序，先一次過嚟兩道前菜，食罷再送上湯品，完晒先嚟意大利麵及薄餅兩道主食；再者，不時添水、換碟基本嘢就更做足，最貼心喺上湯品時，特意俾多幾隻小匙過我哋，可以試試其他人嘅湯。深水埗區一向喺卧虎藏龍之地，又睇睇「食意」會否成為其中一員！
個人評分
味道：9/10
環境：7/10
服務：8/10
抵食：8/10
平均每人消費：HK$185
味道：9/10
環境：7/10
服務：8/10
抵食：8/10
平均每人消費：HK$185
餐廳資料：
食意 Eatalian
深水埗荔枝角道309號地下
2617 6866
食意 Eatalian
深水埗荔枝角道309號地下
2617 6866
沒有留言:
發佈留言