櫃枱頭頂及鋪面都有顯示出食物選擇，不過，既然打算堂食，就先搵個位坐低，再慢慢睇。餐牌有兩版喺各式飲品，如自家制秘調茶、手造奶茶、珍珠奶茶、芝士奶蓋茶、Movenpic咖啡 / 朱古力、即捽現泡茶及新鮮水果茶。
另外兩版就喺甜品，包括雪糕窩夫、蜜糖多士磚、蛋糕及Movenpic雪糕。我覺得窩夫或多士磚抵食，因為會伴一球Movenpic雪糕，散點一球都$42啦！
初時以為餐牌標駐有11款Movenpic雪糕，一般都唔會供應得咁足，就算有7、8款都叫夠多，但估唔到堅有齊11款；而買雪糕，仲可以免費添加配料一次，雖然只喺得卜卜米或可可球，但唔使錢就自然開心架啦，再者，自己扭，就更可以堆高啲、放滿啲！
晌鋪面櫃枱點完餐，飲品就自取，食物之後由店員送上，而飲管、餐具放晌一旁，自由取用。但有時店員都會幫手拎俾你，好似我哋點咗窩夫，店員就隨後遞上刀叉。不過，所以刀叉都獨立包裝，好嘅喺夠衛生，唔好嘅喺無咁環保，希望，將來改為非即棄刀叉就更好喇。
芝士奶蓋淡口阿薩姆茶（$28）、芝士奶蓋炭燒烏龍茶（$28）
我哋同樣揀芝士奶蓋茶飲，每杯茶飲都頗大杯，而且，單從外觀睇，芝士奶蓋部份落得無手軟，親友更話比外間嘅茶飲店落得多，而且，奶蓋面灑多少少車打芝士，雖然對味道影響有限，但就靚仔咗好多。先啜一口啲奶蓋，芝士味濃郁，口感綿密，再插深啲支飲管飲一啖烏龍，茶味芳香微甘，隨後將兩者攪勻，柔滑得嚟，有份茶香，慢慢又滲出芝士香味，感覺好過癮，喺好得意嘅配搭，賣$28喺好貼地嘅價錢。
芝士奶蓋淡口阿薩姆茶（左）、芝士奶蓋炭燒烏龍茶（右）
焦糖香蕉窩夫配特濃咖啡雪糕 $76
雖然標明喺用Movenpic雪糕，而且，窩夫喺一底嘅份量（出面有啲店鋪嘅窩夫唔知點解喺唔足一底），但一客窩夫都只喺賣$76，同樣價錢貼地。唔使多講，睇相就知賣相靚，份量足，雪糕球唔會將貨就價偷雞整細啲，更灑上大量奧利奧餅碎襯底，再淋上焦糖漿。
齋試一件窩夫先，微暖，雖然蛋香味唔算好強勁，但外層十分之脆口，內層就鬆軟綿密。之後，就梗喺伴上咖啡雪糕、芝士忌廉（藏咗晌碟中間，貫徹店名，唔喺用一般嘅忌廉，而哋加入芝士元素）、奧利奧餅碎，一啖放入口，立時滋味無窮，味道豐富，認真有姿勢，有實際。
熔岩芝士薯條 $42
本來食個窩夫都夠皮，不過，大家都仲有嘢傾，杯茶飲又好「襟」飲，所以，追加多一客芝士薯條。「熔岩」唔使多解釋大家都明啦，兜薯條勁多芝士，焗到軟化晒，一拉即扯起芝士絲，啲薯條又炸得唔油，份量同樣足，一口薯條，一啖凍飲，正呀喂！
同親友天南地北乜都講，講飲講食，講旅行，呢啲話題最啱口形，所以，同呢個親戚頗夾。雖然只喺手執一杯茶，但搞笑咁大家碰碰杯，say cheers！
個人評分
味道：8/10
環境：7/10
服務：7/10
抵食：8/10
平均每人消費：HK$87
味道：8/10
環境：7/10
服務：7/10
抵食：8/10
平均每人消費：HK$87
餐廳資料：
Say Cheese
大角咀海庭道18號奧海城二期地下G09號舖
2755 0333
Say Cheese
大角咀海庭道18號奧海城二期地下G09號舖
2755 0333
沒有留言:
發佈留言