金蘭花泰國餐廳 Sawali Club：蘭得友情緣

人與人之間嘅認識真喺好講緣份，能一直維繫到，好講一份情誼，一齊讀書嘅書友仔未必個個成為你嘅老友，同住十多廿十年嘅左鄰右舍亦如是。是晚同幾位晌飯桌上認識嘅朋友，雖然近年各有各忙，情誼卻一直保持住，喺非常難得嘅事情。今晚濟濟一堂嚟到「金蘭花」聚聚舊，食食泰菜，既開心，又滋味。

餐廳話就話位處怡和街，但所屬嘅大廈入口應晌後街渣甸街。一出電梯，大大幅牆畫，無深究其意思，但睇落予人清新嘅感覺。踏進餐廳，用餐區都相當闊落，以木系枱櫈為主，配以綠油油嘅植物作點綴，有一份自然清新感。最喜歡唔似一般泰菜館咁滿天神佛，其實，佢哋都有擺四面佛，只喺放晌入門口位近天花處。

早前同老婆兩個人食泰菜，自不然可以點嘅菜式有限，今晚人多啲，就可以試得多。從餐牌所見，選擇又確喺非常之多，由沙律、湯類、咖喱、小食、主菜、蔬菜、海鮮、飯麵……到甜品等，唔數都知過百款。

此外，晌張餐枱墊上印有多款推介菜式，懶諗嘅就不妨晌度考慮吓！

泰式沙嗲串燒 $78

串燒有豬同雞肉選擇，隨心揀咗豬肉，一客喺半打份量，每串都燒得帶點焦香，沾上自家調製嘅醬汁，酸酸辣辣，變得份外惹味，而豬肉食起嚟鬆化，既有肉香，又富肉汁。

臭草煎蛋 $88

晌主菜類見到呢道菜，好奇會有幾「臭」！其實食落完全無臭味，樣貌只喺有啲似菜脯炒蛋而已，唔算好有驚喜。不過，煎得唔錯，蛋面微微脆口，口感濕潤唔會炒到老晒。

三味魚 $158 

晌張餐枱墊有多款推介菜式，其中一款就喺三味魚，可揀盲鰽或烏頭。其實，食完都唔喺好知何謂三味，但賣相充滿泰式風味，味道酸香而微辣，魚身炸過，所以，外皮十分香脆，肉質亦比預期嫩滑。

泰式炒椰菜苗 $68

一餐飯又點可以無菜，椰菜苗總好似喺晌泰菜常點嘅食材。椰菜苗色澤青翠，炒得火喉恰好，口感爽脆，味道鹹香。

清邁咖喱雞麵 $68

又喺怕大家食得唔夠飽嘅心態，臨尾兩道粉麵，實行塞飽大家個肚。先嚟喺甚富特色嘅雞麵，面面一大餅炸過嘅麵餅，襯上金黃咖喱汁，好搶眼。

麵底，原以為就喺得眼前嘅炸麵餅，原來下面仲有好多粗麵，沾滿咖喱汁，兩者混埋一齊食，半腍半脆，口感過癮，再者啲咖喱汁做得香而滑，雞件亦嫩滑，真喺既特別，又好食。

炒海鮮金邊粉 $78。

第二道粉麵喺炒金邊粉，份量十足，下滿海鮮料，而啲金邊粉酸酸甜甜，濕濕潤潤，拌勻蛋絲、花生碎，撈勻食，倍感滋味。

龍眼水 $28

本來都唔打算講飲品，但杯龍眼水超多龍眼肉，仲加入杞子同紅棗，可以揀熱飲或凍飲，不過，再甜多少少就更合心意喇。朋友話佢哋啲飲品亦唔錯，定價亦唔貴，絕大部份都喺廿零蚊杯。

芒果糯米飯 $86

以一道甜品作結，喺大家期待嘅項目，個糯米飯砌到成朶太陽花形，確喺幾搶眼。糯米飯口感黏糯，軟熟煙韌，再淋上香甜嘅椰奶，自然更添香味；本來配上芒果同食，感更添滋味，可惜，芒果似乎未夠熟，未喺最香甜。

餐後，疑似老闆娘嘅店主問問我哋對食物嘅意見，先知師傅喺地道泰國人，絕大部分食材都喺泰國貨，務求做出正宗泰國口味，再者，大部份菜式定價親民，怪唔得有咁多客人捧場。

個人評分
味道：8/10
環境：8/10
服務：8/10
抵食：8/10
平均每人消費：HK$200

餐廳資料：
金蘭花泰國餐廳 Sawali Club
銅鑼灣怡和街22號3樓
2970 0688