Godiva Chocolatier：公朱同好（18）

呢個系列嘅朱古力食評實在相隔咗好多年無寫，對上一次已經喺2017年1月嘅事，有幸得老友送小弟一包Godiva「Assorted Classic Truffles」（什錦經典松露朱古力），又可以為此寫番一篇延續一下。其實，小弟都好鍾意食朱古力，不過，大多數都喺幫襯超市，方便吖嘛，朱古力專門店則甚少光顧，反而送禮之時先會到訪。

今次所收到嘅松露朱古力，包裝簡單，雖然話喺「什錦」，但查實只有3款味道，盒面已註明有白朱古力、牛奶朱古力及黑朱古力，每款有4粒，以唔同色紙包裝，包裝紙亦有註明味道。

雖然話喺「松露朱古力」，但撕開包裝紙單睇表面，個人已覺得唔可以稱之為松露朱古力，朱古力表面光滑爧身，跟平時所食到嘅形狀不規則、又有層粉粉哋面嘅松露朱古力絕對喺兩回事。

白朱古力

其實，小弟自覺喺食得幾甜嘅人，不過，食咁多年朱古力，都仲未喺好識欣賞白朱古力，始終都只喺覺得佢得個甜字，仲要喺勁甜，少咁一份個性。

牛奶朱古力

朱古力嘅外殼做得薄薄哋，咬落去有脆口嘅口感，內裡填滿朱古力漿，軟滑細膩，可可味濃郁香甜，甜味唔過火。

黑朱古力

跟牛奶朱古力差唔多，外殼都喺脆脆哋，但細嚐會嗒出一份微甘，內裡嘅朱古力漿甘苦味更突出，而且，幼滑細緻。

Godiva始終喺一個大品牌，質素亦喺有一定嘅保証。但始終知道定價唔會便宜，送禮顯得較大體就無妨，自用嘅超市其實有唔少具質素嘅朱古力啊。

個人評分
味道：7 /10
環境：- /10
服務：- /10
抵食：- /10
平均每人消費：HK$0（好友送贈）

餐廳資料：
Godiva Chocolatier
青衣青敬路33號青衣城1樓133-134號舖
2436 9802