沙嗲軒 Satay Inn：情軒一線

今晚同相識廿載嘅朋友聚一聚兼當食團年飯，問大家有無咩心水，只喺話想食得特別啲，所以，就不如試吓「沙嗲軒」，賣新加坡菜嘅餐館中，佢都算喺老字號。再者，佢都附屬晌酒店嘅餐廳，環境及招呼都有多少少保証嘛！剛推出賀年菜「魚生撈起」，夠晒應節啦，友情一線牽。

雖然喺新加坡菜館，但內裡無乜好娘嘅「風味」裝飾，反而一室時尚簡約嘅裝修，木地板中加點花磚，白色牆身加點植物同小裝飾，加上枱櫈嘅編排唔會密麻麻，稍微高嘅樓底，整體環境都予人舒服之感。我哋嚟得早，客人未喺好多，專登揀咗最入嘅梳化位，自成一角靜靜局，傾吓偈。

趁未人齊，就翻翻餐牌，因為，對上一次到訪沙嗲軒（尖沙咀店）已喺2012年嘅事。晌分類上，包括前菜、湯品、雞類、牛肉、海鮮、特色招牌菜、飯類、蔬菜類，尾嗰兩頁就喺飲品及甜品。

如果唔知點揀，不妒晌中間兩大頁嘅廚師推介中做選擇，喺揀菜嘅懶人包。

熱薏米水 $48

唔飲得凍飲嘅朋友就揀熱薏米水，貪其健康，外表就當然平平無奇，但佢話飲落薏米味突出，又話有利水消腫、健脾去濕、舒筋清熱……等功效。

美祿哥斯拉 $68

依家講話美祿恐龍相信好多人都識，甚至有茶記出埋阿華田恐龍，但美祿哥斯拉又喺乜呢？原來喺美祿加雲呢嗱雪糕，貪新奇嘅朋友就揀佢，仲話飲飲吓似奶昔。

椰青 $62

小弟就點個椰青，貪其有清甜嘅椰肉食，而啲椰青水又確喺清甜好飲，一整個，份量又夠大喎，由餐前飲到餐尾。

魚生撈起 $388

見到啱啱推出咗款「魚生撈起」，睇啲單張介紹喺新加坡及馬來西亞華人嘅傳統賀年家常菜，將菜式中嘅食材及醬料一齊撈起，寓意晌新一年裡「風生水起」及「愈撈愈旺」，雖然我哋唔迷信，但貪新鮮都想撈吓佢。

菜式中好多食材或醬汁都有唔同寓，店長講完一次都未必記得晒，好彩單張都有啲介紹。仲話夾起撈勻材料時要一起歡呼「撈起！撈起！」，材料撈得愈高，寓意愈風生水起，哈哈，講明我哋唔迷信，就撈得含蓄啲，所以，我哋咪打一世工都撈唔起囉！

整道「撈起」賣相精緻，一碟喺所有食材，包括：三文魚、薄脆、柚子肉、米粉、甘筍絲、蕃薯絲、青蘿蔔絲、五柳條、檸檬葉、青檸及芫茜，非常豐富；另一碟喺醬汁及配料，包括：梅子醬汁、麻油、鹽、芝麻、花生碎、胡椒粉……等等，當然，唔喺一定要落晒，大可按個人喜好再調和，但梅子醬汁、麻油、芝麻、花生碎依幾款醬料膽落晒都無壞。

最緊要喺撈得夠勻，撈勻之後，入口感覺清爽，因為唔少材料都喺爽口嘅食材，如柚子肉、甘筍絲、蕃薯絲、青蘿蔔絲等，而且，味道紛陳豐富，甜、酸、辣有層次卻唔會雜亂，大家都大讚好睇、好玩、好食！

沙嗲 $102

沙嗲有雞牛豬供選擇，亦可以要齊3款，唔使多講我哋就梗喺要齊3款啦。啲肉燒得有炭火香，熱辣辣，上枱已嗅到肉香，咬落汁豐肉嫩，絕無「乾爭爭」嘅問題，啲焦燶位就更加正，配上自家製花生沙嗲醬，有濃郁嘅花生香，沾過之後就變得更加惹味。伴菜仲加咗啲青瓜粒，作為間場，一串沙嗲、一件青瓜粒，再食沙嗲就保持到嗰份濃香惹味。

招牌海南雞（半隻）$218

近排真喺意外地同海南雞偶遇多咗，而是晚晌沙嗲軒食到嘅海南雞真喺水準極高。先講黃紅黑三色醬料：薑蓉、特製辣椒醬、黑醬油，味道都好對版，尤其啲黑醬油，濃稠帶微甜，伴雞特別有特色；雞肉滑嫩脂肪少，雞皮亦十分爽口，全部都去晒骨，啖啖肉，食味真喺一流，況且，半隻嘅份量真不少，食得盡興。

焗胡椒蝦 $318

黑胡椒蟹晌星加坡好出名，反而焗胡椒蝦就未食過，睇樣似喺煎焗嘅做法，送到嚟真喺好有胡椒香。用上虎蝦，所以，就算開邊都仍然夠大隻，再者，啲胡椒香更「入肉」，唔喺得外表一層，蝦肉好爽彈，胡椒香中亦食得出蝦嘅鮮味。

香辣通菜 $78

睇中文你未必知「香辣」指乜，其實就喺參峇醬，簡單講，小弟就當佢喺馬拉「蝦醬」，炒起啲通菜鹹香惹味，而且，啲通菜翠綠嫩口，食落無渣。

白肉骨茶 $88
小弟唔喺想扮代表，皆因去過多次星馬，知少少肉骨茶分為新加坡嘅潮州派同馬來西亞嘅福建派，前者落較少藥材，味道比較清淡，反而多咗朕稍重嘅胡椒味，夏天飲有醒神嘅感覺；後者就下得藥材較多，所以味道比較濃郁，略帶甘苦，冬天飲有暖胃嘅作用，仲可提高身體抵抗力。今次晌度試嘅係前者，味道較清帶胡椒香，細細件嘅排骨燜得鬆化，伴幾件油炸鬼，個人鍾意浸完湯再沾黑醬油同食。

星洲炒蘿蔔糕 $108
以防大家食唔飽，最後就梗喺以一道澱粉質菜式填滿大家肚皮，講特色星洲炒蘿蔔糕相信無乜人反對，食落口感有啲似大馬嘅炒粿條咁。蘿蔔糕質感軟身，蘿蔔味重，蘿蔔糕以外，仲有蝦仁、蛋漿同炒，更混有少少菜脯粒，食落惹味鹹香。

原本就諗住以甜品作結，尤其有小弟心水嘅榴槤布甸，但估唔到以上菜式碟碟份量十足，食到大家飽一飽，再無位容下甜點，一切榴槤布甸、嚤嚤喳喳、星洲紅豆冰……就只好留待有機會先再試。沙嗲軒，無論晌環境，抑或服務，都讓人感到好稱心，尤其服務一環，添水換碟基本嘢唔在講，上菜唔太急，感覺樣樣都恰到好處。

個人評分

味道：9/10
環境：8/10
服務：8/10
抵食：8/10
平均每人消費：HK$270（指定信用卡9折）

餐廳資料：
沙嗲軒 Satay Inn
北角城市花園道9號城市花園酒店地下低層
2806 4938