Rondavy's Artisan Kitchen：好友狂嚐曲（72）

呢一篇諗咗好耐，究竟加唔加入「好友狂嚐曲」嘅系列，因為，嚴格嚟講，佢絕對唔喺曲奇，但個名稱又跟曲奇扯上關係，就喺嚟自「Rondavy's Artisan Kitchen」嘅Sconkie。粉藍色嘅包裝盒，仲要襯上喱士花帶，少女味十足，難以想像喺送俾小弟呢個麻甩佬作為生日禮物，實在太多謝友人餽贈。

咁咩叫做Sconkie呢？其實，取自Scone+Cookie，但完全唔太曲奇嘅元素，至少成份上牛油排到最後，份量佔得非常之少，只可以睇為迷你版嘅士乾（Scone），或者做成曲奇呎吋嘅士乾。

內裡共有6款Sconkie ，全獨立包裝，跟住，再慢慢逐款細嚐，跟大家分享。

Earl Grey

睇佢外觀，就知用料十足，未食都已經聞到伯爵茶嘅香氣。入口，跟食一般嘅士乾分別唔太，乾乾哋身，軟軟腍腍，但茶味真喺濃郁。

Sesame

輪到芝麻味，同樣喺芝麻味突出，咬到細碎嘅黑芝麻。其實，士乾嘅質感唔喺人人都識欣賞，佢哋棄曲奇，而做成士乾，都有少少冒險。

Ginger

睇樣就唔知哋點，要試吓先知龍與鳳。咬落，啲薑味確喺幾出，帶微微辛味。

Garlic

蒜味嘅嘢一向討人歡心，因為夠香濃惹味。呢粒士乾嘅蒜味，亦都夠晒強勁，未入口都聞到。

Coffee

相對以上嘅味道嚟講，咖啡味則比較大眾化，但同樣做得出色，咖啡味都頗香醇，配番杯咖啡，一流啦！

Cocoa

取而代之嘅，喺比朱古力更濃、更甘苦嘅可可口味。可可味挺濃郁，帶微微嘅苦味，感覺不俗。

文初都有講，Sconkie理論上視為迷你版嘅士乾，所以，放咗晌「好友狂嚐曲」嘅系列之內，明顯有點抽水之嫌，名符其實嘅偽曲奇食評，哈哈。

個人評分
味道：7 /10
環境：- /10
服務：- /10
抵食：- /10
平均每人消費：HK$0（好友送贈）

餐廳資料：
Rondavy's Artisan Kitchen
銅鑼灣耀華街3號百樂中心11樓
2893 2128