「逸．酒店」曾嚟過食自助餐，「Moreish & Malt」位處酒店一樓，上到嚟原來自助餐餐廳已經變成中菜館。而另一邊就喺今晚我哋食飯嘅地方，果然喺開心星期五，客人非常之多。餐廳裝修有別觀塘店，無賣工業風，換嚟一室時尚型格，多組馬蹄位令客人有自成一角之感。我哋則揀咗挨窗睇睇街景嘅二人位。
店名嘅「Malt」指麥，就喺釀啤酒嘅主材料之一，所以，店中提供多款手工啤酒。如果喜歡飲啤酒，佢哋更提供90min任飲北海道札幌啤推廣，只喺$98就可以飲唔停，不過，就只限星期一至五歡樂時光時段。
散點餐牌，食物分湯品、沙律、小食、墨西哥美食、三文治、漢堡、意大利麵、烤肉、配菜及甜品。
但睇勻兼跟散叫對比一下，佢哋嘅「Happy Meal」開心晚市二人套餐真喺抵到暈，$398 + 10%已包兩客餐湯、頭盤、烤肉（2揀1）、意大利麵（2揀1）及兩杯餐飲，單喺份美國肉眼散叫就要$248啦，更可以加錢配甜點添，所以，個套餐真喺物超所值。
意大利香草包
餐前先嚟一小籃意大利香草包，喺小弟嘅心水包款，麵包軟熟，帶微微香草香，最有心思喺加入乾番茄，配上橄欖油及黑醋，簡單清新。
忌廉西洋菜湯
是日餐湯嘅款色頗少見，喺忌廉西洋菜湯，其實以西洋菜做西湯，都唔喺第一次，曾經晌「Les Saveurs Private Kitchen」試過一次，翠綠色嘅餐湯讓人印象深刻。今回重遇，西洋菜嘅成份無下得咁重手，但味道細膩，入口亦頗幼滑，令今晚餐飯有個好開始。
牛油果三文魚籽蟹肉脆餅
再落嚟嘅前菜好正，將牛油果跟蟹肉打勻，鋪晌脆餅之試，加埋啲三文魚籽，賣相精緻亮麗。一口咬落，啲脆餅堅脆口，咯咯聲，而啲牛油果已混入蟹肉內，估唔到喺勁多蟹肉，味道好鮮，三文魚籽多添鹹鮮味，喺美妙嘅提味劑。所伴嘅沙律菜，加咗櫻桃蘿蔔，淋上醇厚嘅黑醋，一啲都無迤做。
燒美國肉眼扒配炸薯條 +$30
烤肉有兩款，一喺豬肋骨，一喺就肉眼，當然寧願加錢要10安士肉眼啦。果然喺10安士份量，上枱件扒好大塊，伴有大量脆炸薯條，而且烤得件扒好靚仔，有炭火嘅焦香，要5分熟，切開色澤保持紅潤，卻唔會有血水滲出，燒得恰到好處，食落肉質軟腍，肉味濃郁，沾點燒汁，好好食，唯挑剔位喺件扒比較多筋，否則就完美喇。
香濃蕃茄燴牛肉醬蜆殼粉
意大利麵有兩款，一款喺肉醬蜆殼粉，另一款喺卡邦尼意粉，後者食得較多，所以，就選上前者。啲蜆殼粉選用大粒裝，感覺比細粒嘅好食，而且，煮得好有咬口，個燴牛肉醬又做得濃郁富肉香，整道蜆殼粉極之惹味，好得。
熱咖啡、薄荷茶（餐飲）
因為打算加配一客甜點共享，所以，餐飲就揀咖啡，總覺得喺配甜點嘅好朋友。細細杯即磨咖啡，香醇芳香；而表哥揀嘅喺薄荷茶，有化胃氣、幫助消化、舒緩緊張之效，飲落會令人舒暢。
特濃朱古力芝士餅 +$48
加配甜品只有兩款：蘋果金寶或芝士餅，見佢芝士餅加入特濃朱古力，喺吸引我一試嘅原因。芝士餅部份嘅芝士味好香濃，而朱古力餅部份亦非常濃郁，喺口感比較硬淨咗啲，做番軟身啲就理想喇。
除食物表現出高水準外，服務亦熨貼，菜式一道接一道，不緩不急啱啱好。傾談間，佢依然為細路仔嘢心煩，表姨甥女已經喺中五生喇，讀書都仲喺迤迤哋，唯有希望佢突然生性（雖然渺茫），能夠「麥」默耕耘，作最後衝刺！
個人評分
味道：8/10
環境：8/10
服務：8/10
抵食：8/10
平均每人消費：HK$265
味道：8/10
環境：8/10
服務：8/10
抵食：8/10
平均每人消費：HK$265
餐廳資料：
Moreish & Malt
紅磡蕪湖街83號逸‧酒店1樓
2275 8778
Moreish & Malt
紅磡蕪湖街83號逸‧酒店1樓
2275 8778
沒有留言:
發佈留言