餐廳位處百樂中心21樓，同樣佔全層樓面，一踏入門口喺半開放式廚房，睇到內裡嘅運作及大廚做菜嘅模樣。而轉個彎就喺用餐區，地方唔算大，但卻有種舒適悠閒嘅感覺，相信主因除一室柔和嘅燈光外，就喺因為店主無用到盡每一吋地方擺下餐枱櫈，所以，予人空間感十足，全無侷促之感。
此外，靠牆一大幅粉筆風景畫，令環境添幾分藝術氣息。事後再睇睇其他人嘅食評，先知幅牆畫喺不時會變，雖知幅畫喺粉筆畫，重畫一次需花多少時間呢！真欣賞店家對用餐環境嘅要求同堅持。
餐廳尾，原來仲有啲廂房，因為，到訪當日訂位嘅客人唔算多，所以，就未有開放廂房嘅位置，故不知道內面有幾大。
跟Chez Moi唔同，依度喺有散點菜式，先同大家簡單介紹吓，餐牌提供菜式包括沙律、冷盤凍切、頭盤、海鮮、湯品、主菜、意大利麵、意大利飯及甜品。
除基本冷熱飲品，仲有啤酒、雞尾酒、紅白餐酒供客人選擇。
我哋就意屬3道菜嘅晚餐，因為已包括沙律、餐湯及主菜，並奉上啡茶，而定價視乎所揀嘅主菜（$328-$398 + 10%），相信對比散叫，應該划算啲。
麵包籃
等候上菜期間，食住麵包先，麵包籃內有兩款包，送上枱時帶點熱度。一款喺圓型細小嘅法式軟包，軟熟富牛油香，另一款加入乾果嘅麥包，有韌性富麥香。枱上備有橄欖油及黑醋，亦可向店員要求牛油，但依兩款包無添加淨食都已經夠晒。
沙律有兩款選擇，我哋兩款要晒就唔使煩，兼「些牙」嚟食，就可以試勻佢。
鮮魚湯煮法國白露筍配帶子海膽
賣相絕對可以用精緻嚟形容，但與其叫沙律，個人就覺得似一道頭盤多啲，而且，用料非常之精。露筍不時都有機會食，但法國白露筍就極之少，用上鮮魚湯浸煮，令白露筍有份魚鮮味，更入口嫩滑無渣；帶子睇樣你都見有幾大粒，口感爽彈，配上綿柔嘅海膽，滿口海洋鮮味；亦咪錯過伴碟嘅冰菜，佢真喺好似有層霜雪晌面，入口卻唔會冰咁凍搞到牙都軟，但就嗦嗦聲咁脆。
意大利巴馬火腿凱撒沙律
另一道就喺經典嘅凱撒沙律，但就加入新元素。除基本嘅羅馬生菜、煙肉碎、麵包粒，仲加上意大利巴馬火腿及石榴籽，前者提升鹹香感，後者增加清新度，又有少少爆汁感，互相揮映。細節位喺啲羅馬生菜既爽脆，啲醬汁又撈得極均勻。
下一環就喺餐湯，3揀1，選擇有法國洋蔥湯、荷蘭白菌忌廉湯及周打蜆肉忌廉湯。亳無懸念，頭兩者喺我哋嘅心水，皆因法國洋蔥湯喺法國菜嘅經典，點可以錯過，而以荷蘭白菌嚟做嘅忌廉湯，又會唔會寧舍唔同！
法國洋蔥湯
剛巧早前晌中環嘅Bouchon Bistro Francais試過其法國洋蔥湯，Bouchon嘅可以稱為正統，咁Chez Bistro嘅就可以定為新派，因為佢哋將百吉包及芝士兩個元素「分拆」放晌碗邊，淨食又得，再浸湯食都得。然而，主角嘅洋蔥湯底做得不俗，散發出濃濃洋蔥嘅香味。
荷蘭白菌忌廉湯以新鮮荷蘭白菌打成，個菌味頗為濃郁，口感亦都細滑，並輕輕保留少少微細菌粒，有少少咬口感之餘又唔會太影響個口感滑度。晌湯面加上幾片乾白菌片，作為點綴，我就覺得幾有晝龍點晴之效嘞。
主菜方面，一共有6款，已包括安格斯西冷、安格斯肉眼、伊比利亞羊扒、伊比利亞橡果豬、法國鵝脾及是日新鮮魚柳，睇來源地，就知唔喺普通貨色。
炭燒西班牙伊比利亞有機無骨羊扒配蜜糖芥茉籽汁 $368西冷、肉眼、羊扒都喺心水，但要選一款，都喺以羊扒高些微票數得我歡心。初時諗住啲羊扒喺裁成一塊塊，估唔到厚切成一件件，食落好有炭火香，肉質腍滑，甚富肉汁，肉羶味唔太重，但最特別喺層表皮，卜卜脆得嚟好似食燒腩仔咁，非常特別，沾少少蜜糖芥茉籽汁，甜中帶微辣。啲荷蘭串茄焗過嚟，茄味更濃，卻又依然多汁 。
法式低溫香草焗法國鵝脾配忌廉焗薯仔片及法式油浸蒜頭 $368
表哥所揀喺法國鵝脾，因為佢話燒鵝脾就食得多，法國鵝脾唔知會喺點。講笑咁講，表哥話隻鵝脾外觀有啲似鹵水雞脾，但肉質非常鬆化，有少少鵝肉嘅羶昏香，只喺有少少過鹹。而配菜比個羊扒精彩，除荷蘭串茄，仲有忌廉焗薯仔片及法式油浸蒜頭，前者好有薯香，帶少少滑身，後者蒜味好濃縮，但就唔喺人人都鍾意食。
鮮奶咖啡、意大利泡沫咖啡
最後，兩表兄弟齊齊嘆杯咖啡，繼續講講軼事。店家採用意大利品牌illy咖啡豆，質素自然差極有限，雖然小弟杯鮮奶咖啡嘅拉花麻麻，甚至有啲亂咁嚟嘅感覺，但咖啡味依然醇厚芳香，只喺口感欠綿密。
食法國菜通常俾人嘅感覺喺好高級，但嚟到Chez Bistro就無咗份拘束感，可以輕輕鬆鬆咁用餐。定價方面，以法國菜而言，加上所用嘅食材，實屬相宜，但貪心講多句，如果個套餐送多一客甜品就完整喇。
個人評分
味道：8/10
環境：8/10
服務：8/10
抵食：8/10
平均每人消費：HK$405
味道：8/10
環境：8/10
服務：8/10
抵食：8/10
平均每人消費：HK$405
餐廳資料：
Chez Bistro
銅鑼灣耀華街3號百樂中心21樓
3101 0321
Chez Bistro
銅鑼灣耀華街3號百樂中心21樓
3101 0321
沒有留言:
發佈留言