餐廳環境唔大，逼逼哋大概坐到30、40人，裝修簡約，走年輕人路線，唔喺店名都未必知佢喺賣韓國嘢。跟好多流行嘅韓式餐廳咁，以五顏六色嘅「電油桶」做櫈，打開就可以放袋、放背囊。而餐枱仲有少少機關，就喺好似茶記咁加個抽櫃晌下面，放好晒所有餐具及餐牌。
晌門口入嚟之前，已見到佢哋有啲好抵食嘅2人餐（$138）、4人餐（$288），份量十足，所以，見好多客都費事諗，點套餐搞掂。
晌餐枱上，更貼有一個「特選2人餐」（$158），比原價平多35%，無詳細研究，應該喺啲網上優惠，但睇張相就十分之豐富嘞！
然而，小弟一支公就梗喺睇住個散嗌餐牌，而依間同沙田嗰間有啲唔同，我記得嗰間似快餐店形式，晌櫃枱排隊買嘢食再等店員送上嚟，但依度就似一般餐廳由店員上嚟落單，再將食物送上，卻全無加一服務費。而且，選擇不少，以韓式菜式嚟講，定價都唔算貴。
最後瞄向到餐牌中有一欄「廚師精選」（$70-$80），有啲韓式鐵板類，都好似好耐無試，所以，揀咗其中一款：韓式鐵板牛小排，並送特選飲品及跟白飯一碗。餐牌標示話就話要等10-15分鐘，但都好快上到菜。
不過，店員話內容已改，無再送特選飲品，而喺改為前菜小食一客，咁就盡快改改餐牌，避免不必要誤會。就算散點，一客前菜都只喺$6，絕對食得過，而且，亦可以以+$15要齊3款前菜。
泡菜、薯仔、魚餅
唔喺講笑，佢哋啲泡菜都真喺幾辣吓，超刺激，咬落仲帶點爽脆口感；而薯仔喺未搓到爛透嘅薯蓉，所以，食起嚟仲有啲薯粒，最鍾意喺佢加入青瓜絲，好爽口；魚餅睇嚟似腐皮，味道鹹鹹甜甜，口感就煙煙韌韌。
韓式鐵板牛小排 $80
送到嚟仲感受到塊鐵板滾熱熨，而牛小排就喺平常我哋講開嘅牛仔骨，份量唔少，都有成6、7件之多，好有肉香，當然唔及西冷、肉眼般軟腍，但質素算唔錯；個特製醬汁亦好滋味，白飯軟熟有米香，加埋啲醬汁確喺幾好食。而鐵板之上仲有幾件韓式年糕，極有咬口！
蜜桃冰茶 +$12雖然無嘢飲送，但亦可以用優惠價配一杯蜜桃冰茶，飲落冰涼清爽，幽幽茉莉茶香，又似帶點蜜桃香味，且蜜桃果肉也不少，更夠晒大杯。
熱辣辣嘅鐵板牛小排，邊食邊飲住冰涼清爽嘅蜜桃冰茶，真喺好爽架。路德圍依邊超多食肆，競爭唔細，不過，見店內有唔少後生仔幫襯，韓式快餐店仍好得佢哋受落。只要食物保持水準，荃灣區人口又夠密集，猶如新船咁重新啟航，應可以大有作為！
個人評分
味道：8/10
環境：7/10
服務：8/10
抵食：7/10
平均每人消費：HK$104（試食邀請）
味道：8/10
環境：7/10
服務：8/10
抵食：7/10
平均每人消費：HK$104（試食邀請）
餐廳資料：
Hungry Korean
荃灣路德圍運通街10號運通洋樓地下M舖
3956 8101
Hungry Korean
荃灣路德圍運通街10號運通洋樓地下M舖
3956 8101
沒有留言:
發佈留言