美味小炒茶餐廳 May May Restaurant：我的美孚下午茶餐 ~ 油閒炒麵

「美孚下午茶餐」依個系列真喺好耐無出過，查返對上一篇已經喺2014年年初嘅事，一來少咗晌美孚食下午茶，二來食過幾次又覺得無咩特別，都無乜好寫。本來，最近開咗間新茶記「東霖小廚餐廳」，可能喺新開，多人多到不得了，所以，改咗去轉個彎嘅「美味小炒茶餐廳」。

晌「美味小炒茶餐廳」，下午茶都食過一次，但已經喺2012年嘅事。環境喺好街坊嘅茶記格局，地方細細喺逼夾啲，但勝在乾淨企理，以前食評都有講，所以，今次就唔多提。講番下午茶餐，最平就喺三文治或多士餐，$22-$28有交易，其他嘅碟頭飯麵餐或炒公仔麵餐，定價為$34，例包熱飲。

蝦醬乾牛河 $34

因為喺下午茶餐嘅緣故，份量比正常嘅碟頭肯定細一截，不過，以下午茶嚟講，夠晒食啦。加入蝦醬嘅乾牛河送到上枱，寧舍香。牛河炒得夠均勻，亦無炒到碎濕濕，添咗蝦醬，更加鹹香惹味。

羅漢齋炒麵 $34

老細揀素食嘅碟頭粉麵，一喺佢，一喺就羅漢上素飯。個炒麵睇樣就似模似樣，餸料都唔少，草菇、珍珠筍、竹筍、腐竹、木耳、白菜仔……等等埋滿面，味道亦調校得清淡，只可惜太油，食到近尾，老婆話都要放棄。

熱奶茶、熱檸水
仲記得佢哋嘅奶茶喺唔錯，雖未喺好絲滑咁，但茶底絕對芳香。老婆杯檸水都落足檸檬，無話下午茶餐就少一、兩片。

晌美孚嘅茶記中， 「美味小炒茶餐廳 」算喺合我心水嘅茶記之一，不過，今次嘅下午茶餐，就好壞參半喇。

個人評分
味道：6/10
環境：6/10
服務：7/10
抵食：7/10
平均每人消費：HK$34

餐廳資料：
美味小炒茶餐廳 May May Restaurant
美孚美孚新邨百老匯街25號C地下
2741 8497