浜焼き Hamayaki Jiro Japanese Restaurant：歡樂浜燒

食新鮮海鮮，以往較多喺同一班死佬入屯門三聖，即買、即煮，食材夠晒揀手新鮮。今晚同表哥嚟到「浜焼き」，同樣以新鮮海鮮即燒為賣點嘅浜焼，加上以其他時令食材入饌，做出唔同嘅日本菜式，好期待嘅一晚歡樂今宵。

門面已裝修得好有特色，大型清酒桶，吉祥物，多支日本清酒，更掛上「備長炭使用店」、「日本產米使用店」，可見店方晌用料、做法要求嘅執著。

入到店內，地方唔大，一派典型日式小店格局，內裡更掛滿日本海產店嘅旗布，蠻有氣氛。主要設有4或6人枱，而枱嘅面積亦較大、較寬敞。每枱已擺放咗一個專用火爐、清酒、醬油，喺作為席前浜燒之用。

既然喺浜焼店，海鮮自然喺主力嘅食材之一，門口左邊就放有一個三層魚缸養住啲靚海鮮，因為日日返貨，唔會儲太多。因為海鮮都喺外國入口靚貨，正所謂一分錢就一分貨，所以，晌度消費就要有心理準備喺唔便宜。

啡色喺主餐牌，製作沉實精簡，內裡圖片唔多，主要以文字表達各道菜式。按次序大概分類為前菜、揚物、丼、一口料理、刺身、壽司、浜燒、備長炭燒物、Omakase。

唔單止門面，廚房頂上都擺滿唔少清酒，而黑色餐牌就喺酒餐牌，日本清酒多達近30款，仲有紅白餐酒、香檳、啤酒、生啤，好此道嘅朋友可以飲過不奕樂乎。尾頁亦有無酒精飲品及甜品提供，順帶一提，切餅、開瓶需額外收費。

 炙燒平目魚邊沙律 $138

先嚟一客沙律開開胃，賣相色彩繽紛嘅沙律予人感覺好清新，唔只睇得，都好好食，以爽脆嘅沙律菜撈上油醋為基礎，加入車厘茄、牛油果、紫洋蔥、青瓜片，令味道清爽；而混入鹹鮮嘅三文魚籽及幽香嘅黑松露醬，細味下會食到味道層次嘅變化，而炙燒平目魚嘅嫩滑口感，令整道沙律錦上添花。

刺身盛合 $468

刺身盛合分為5種類（$468）、6種類（$548）及8種類（$738）三款選擇，雖然有說明每一款會包括咩刺身，不過，日本人一向做事有要求，不時不食之餘，仲要睇吓來貨靚唔靚，就好似我哋嘅5種類刺身盛合，因為店員話牡丹蝦唔靚，師傅改為油甘魚奉客，仲俾咗兩款吞拿魚唔同位置（中拖羅、赤身）我哋品嚐。再留心啲嘅話，就連啲日本芥末都喺由鮮山葵即磨。

三文魚

睇色澤、紋理，已感覺到刺身嘅水平不賴，所有刺身都厚切，而三文魚入口果真肥美油潤。

劍魚腩

雪白帶淡紅嘅劍魚腩，質感感覺挺實啲，平常散點刺身都較少品嚐。

帆立貝

帆立貝喺唔少人鍾意嘅刺身款式，小弟都一樣，貪其口感軟綿，味道鮮甜。

油甘魚

牡丹蝦換上油甘，因為入秋就喺開始當造，剔透嘅油甘魚刺身，質感帶點黏牙，魚味甘腴。

中拖羅

淺粉色嘅中拖羅，喺吞拿魚近腩位嘅地方，易積聚脂肪，故食落寧舍肥美肥美富油香。

赤身

呈深紅色嘅赤身，雖油脂比例無咁多，但魚嘅鮮甜味絕不遜香，沾少許醬油，添丁點芥末，魚鮮味更突出。

食完新鮮高質素嘅刺身，再落嚟就喺是晚主角「浜燒」，浜燒有散點、亦有拼盤形式，當然以後者為划算啲，所以，見較多人會點。定價為3款：1人前（$259）、2人前（$668）及4人前（$1,168），全程有店員代勞堂前烤燒、烹調，可坐定定安心享用。不過，因為會逐樣逐樣食材處理，所以，會花點時間，故要有一份悠閒嘅心態嚟享受浜燒。

浜燒盛合二人前 $668

二人前共有5款海鮮食材，據店員介紹（希望無記錯產地），包括：北海道帆立貝、日本廣島蠔、日本蟹肉蟹膏、南非活鮑魚、越南虎蝦及日本魷魚，以本盆盛載，「鮮」聲奪人登場，整體份量唔少，而且，鮑魚、虎蝦都喺晌魚缸撈上嚟，鮑魚仲郁郁吓。咦！數一數，喺有6樣嘢食喎，店員話新張無耐，加料優惠當益吓啲食客，做好個口碑。多咗嘅日本魷魚，散點都要$66一件。

北海道帆立貝

之前刺身食過帆立貝，依家以浜燒感覺好唔一樣。帆立貝燒至半熟，會倒入少少清酒再燒，收收水再加丁點醬油，最後起肉再剪開奉客。口感爽甜，帶清酒香氣，真喺唔錯，而貝上嘅湯汁千祈唔好錯過，嗒落鮮香。

日本廣島蠔

燒蠔跟帆立貝做法差唔多，因為啲蠔本身已可以生食，所以，唔會燒得太熟，故燒完亦唔會大縮水，而且，蠔肉飽滿圓潤，入口蠔味濃，仍帶少少爽脆感，亦有海水鹹鮮味，更適合唔太食得生蠔嘅朋友！

南非活鮑魚

南非鮑魚一向都幾出名，鮑魚只簡單下少許清酒吊吊味，燒過嘅鮑魚仲會剪成一片片，方便客人享用。燒得啱啱好，食落煙韌且有彈性，鮑魚味好突出。

日本魷魚

魷魚原隻即燒，燒到咁上下時間，會搽上如鰻魚汁舨嘅濃郁醬汁，之後再剪開一圈圈燒燒邊位，而魷魚會配上薑蓉上枱，比較少見。魷魚燒嘅時候已經香氣撲鼻，入口柔韌有咬口，沾一點薑蓉效果幾有趣。

越南虎蝦

虎蝦體形大隻好對辦，店員唔單只將虎蝦燒香，要細心拆殼，仲擺番得靚靚先上枱。虎蝦蝦肉頗為爽彈，蝦味絕不乏禮，正喎。

日本蟹肉蟹膏

蟹隻取自日本松葉蟹，而且，拆咗唔少蟹肉，燒嘅時候店員會將蟹膏、蟹肉、蛋黃及蔥花拌勻慢烤，燒好嘅蟹肉蟹膏喺泥灰色，雖然無咁好睇，但邪惡嘅味道集濃、鮮、甘香於一身，店家更特備配以低鹽薯片同食，非常有趣嘅食法，效果比想像中更好。

A4和牛（日本產） $318

備長炭燒物提供多款串燒，不過，佢哋嘅美國安格斯、日本和牛，都以備長炭嚟燒製，比起用一般嘅炭就更健康，對空氣無製造咁多污染物，而一客A4和牛厚切6件，再伴上兩件日本青椒仔做伴碟。雖然無見到件A4和牛嘅真身，但從入口嘅口感、味道，足證其油花應該幾平均而細密，每一口都充滿油香，此外，肉質頗軟滑，又富肉汁，絕對喺一件高質嘅和牛，不過，消費真喺唔便宜。

柚子雪葩、益力多雪葩

諗住滿充咁完結今餐，原來，餐後店家仲會免費奉送清爽嘅自家製雪葩俾客人清清味蕾。是晚嘅雪葩有唔同口味，無論柚子抑或益力多口味，都甚好食，前者柚子味好突出，清新富柚香，而後者酸酸甜甜，食過令人冰涼爽快。

一來既喺日本餐廳，二來以堂前浜燒為賣點，所以，服務做得一絲不苟，每道菜都幫我哋換上新碟，添茶頻密，招呼有禮妥貼，故此，今晚食得開懷。

個人評分
味道：8/10
環境：8/10
服務：9/10
抵食：7/10
平均每人消費：HK$880

餐廳資料：
浜焼き Hamayaki Jiro Japanese Restaurant
尖沙咀廣東道82-84號流尚店4樓
3705 1098