朋友未到，先點啲嘢飲，Bel Cibo既賣海鮮，亦有賣酒，餐酒、烈酒、雞尾酒故然唔少得，近年大熱嘅手工啤一樣有，而且，近入門口位更放咗多款手工啤俾客人試，據店員介紹全部都喺口味富特色嘅出品。最正喺佢哋唔介意俾客人試，難怪入門個櫃放咗咁多手工啤啦！
講番啲飲品先，晌飲品餐牌上，除酒之外，有數款沙冰、奶昔、混合果汁梳打我哋都頗有興趣。
Cookies Banana Milk Shake $62
小弟就揀個香蕉奶昔降下溫，個奶昔賣相都幾得意，因為上面加咗啲奧利奧餅乾同朱古力條，正正啱晒我食住啲朱古力餅，飲吓奶昔咁等朋友。而個奶昔嘅蕉味都幾十足，奶滑度都唔錯，至緊要夠晒凍，一喝解千暑。
Max Fruit Soda $52
混合雜果梳打可以晌咁多款果汁中揀其中兩款，朋友就揀桃味夾芒果，賣相同樣夠玩味，桃味果汁早已溝入梳打底部，而芒果汁就放晌針筒內，雖然最後都喺溝埋一齊，但就可以先試試個桃味梳打，跟手再溝勻試個混合梳打。友人話桃味比較突出啲，並話唔知佢哋喺咁做法，否則揀兩款唔同色嘅果汁嚟溝吓，可能色彩更靚。
Mango Smoothie $58
另一位朋友所揀嘅芒果沙冰，話味道唔錯，芒果味頗為清甜，而且打得都幾柔滑，至少唔會有啲冰粒感，入口非常爽快。
一邊飲住，一邊傾偈，頭盤及主菜都陸續登場，順便介紹吓餐廳有咩菜式選擇。超巨型嘅餐廳，中英對照，兼圖文並茂，主要分類為湯、頭盤、沙律、小食、主菜、意粉、薄餅及甜品。
此外，有更划算嘅二人餐，包3個頭盤、餐湯、第一主菜（2揀1）、第二主菜（3揀1）、甜品拼盤及啡茶，可以講喺內容非常豐富。定價$588 + 10%，睇嚟都幾划算！
法國生蠔拼盤 $298
餐廳啱啱做緊生蠔推廣，法國生蠔每隻只賣$38，有食開蠔嘅朋友都知，依個價喺非常抵食嘅價位。仲要8隻蠔，加送兩杯餐酒，賣大包價$298，即喺等同免費送兩杯餐酒。
一份生蠔拼盤，8隻法國生蠔共有3款品種：Fine de Claire（3隻）、Gold Beach（2隻）以及Go Special（3隻），幾款都喺屬較大隻嘅品種，配以檸檬角及自家調嘅雞尾茄醬，後兩款都喺第一次品嚐，印象中亦喺較少聽過嘅名字。
Gold Beach
蠔肉十分肥美，以爽脆感為主，海水味適中，較易討人喜歡。
Go Special
食落個人覺得蠔味餘韻長，鮮甜而口感爽脆。
Fine de Claire
肉質似乎相對實淨，但海水味強烈，所以，喺3款之中應該喺最鹹嘅一款。
西班牙風乾火腿紅茄多士 $98
一客有4件，以烘到超脆嘅牛油百吉包墊底，上面鋪上鮮蕃茄粒再堆滿西班牙風乾火腿，一入口就知好對辦，火腿油潤充滿鹹香嘅味道，襯以酸香嘅蕃茄粒粒，絕無油膩嘅感覺，超好食。
鵝肝春卷 $98
睇起嚟似乎無乜特別嘅春卷，真喺好簡單捲住鵝肝就咁炸，不過，食落香脆唔油，鵝肝添加咗一份甘腴嘅香味，而佐食嘅千島醬原來喺自家處理過，因為食起嚟比平常嘅千島醬喺有啲分別，醬內多咗啲洋蔥粒之類。另外，配以新鮮蔬菜條，爽脆清新，正好減低食油炸嘢嘅罪惡感。
龍脷紫菜意大利飯卷配南瓜薑味醬 $158
搵意大利飯做壽司卷，真喺好有創意，加上用埋龍脷柳做成反卷，真喺別具心思，不過心思還心思，出嚟嘅效果個人就覺得唔太理想。首先，龍脷柳都喺香煎嘅最好食，依家只喺似煮腍咗嘅魚肉，紫菜亦搶走啲魚味；意大利飯同樣有偏腍嘅問題，無晒咬口嘅特性，反而個南瓜醬帶點薑味幾得意，但如薑味再強啲就更有個性，依家薑味未免隱約啲。
炭燒日本活性水飼豬鞍 $248
主菜嘅豬鞍就非常有質素，好討好嘅一道菜式，店員上菜時仲介紹俾我哋知款豬鞍重點喺豬隻以礦泉水飼養，曾記得以前晌旺角一家餐廳食過依類豬鞍，生熟度可以好似煎牛扒咁，唔需全熟，五乘喺最好添，不過店方為免客人太擔心過生，一般做到七乘。炭燒出嚟嘅效果令外觀好靚仔，的確，切開一睇，色澤好粉嫩，入口肉質頗嫩滑，帶點爽口嘅感覺，而且甚富肉汁，唔使沾任何汁醬已好好食 。順提一帶，配菜已見心思，車厘茄焗過，更濃縮酸香，法邊豆以黑椒輕炒，變得更惹味。
綜合整晚嘅餐廳體驗，頭盤及小食頗有驚喜，大菜類則好壞參半。今餐貴在有食蠔，所以如果唔食蠔，人頭消費會晌三百蚊樓下。招呼方面非常好，斟水、換碟好到位，店員亦非常有禮，最有印象喺店員嘅一句話，當佢送餐或斟水後，我講句「唔該」，佢回句「應該嘅」，今時今日，有啲侍應連基本禮貌都無呀！
個人評分
味道：7/10
環境：7/10
服務：9/10
抵食：7/10
平均每人消費：HK$395
味道：7/10
環境：7/10
服務：9/10
抵食：7/10
平均每人消費：HK$395
餐廳資料：
BEL CIBO Seafood Bar & Restaurant
尖沙咀厚福街8號H8 12樓
2321 2112
BEL CIBO Seafood Bar & Restaurant
尖沙咀厚福街8號H8 12樓
2321 2112
沒有留言:
發佈留言