先概略介紹一下個2人晚市套餐，包括頭盤兩客（4揀2）、餐湯兩客、主菜兩客（4揀2，或加$200升級為海鮮西班牙炒飯）、甜品一客及餐飲兩杯，餐飲更可以揀紅香餐酒或有氣酒添，定價$588 + 10%。原來，依個餐只限灣仔店，且只有星期一至四及星期日晚上供應。
頭盤嘅4款選擇分別喺西班牙黑毛豬火腿配西班牙蕃茄醬及多士、精選沙律、炸虎蝦天婦羅及秘製醬汁烤雞中翼。Espuma主打西班牙嘢，個西班牙黑毛豬火腿自不然成為首選啦，而沙律夠健康，又可以開開胃，成為我哋嘅頭盤次選。
西班牙黑毛豬火腿配西班牙番茄醬及多士
果然豈止二人餐份量，睇睇個黑毛豬火腿，每樣都足6件，方便我哋分，仲以蕃茄及沙律菜做伴菜。先淨食黑毛豬火腿，捲成條狀，入口充滿油香，味道鹹鮮不俗；再試試蕃茄莎莎配多士，多士好脆口，蕃茄莎莎酸香鮮活，好有清爽感；之後，再以黑毛豬火腿夾蕃茄莎莎配多士，一口過幹掉，油香與酸香交融，感覺夠特別。
精選沙律
無諗過會咁大堆頭，以為叫精選都喺掛個名，但晌新鮮嘅沙律菜中加入車厘茄、煙三文魚、黑白芝麻吞拿魚、雞蛋……等等，睇落十分豐富。沙律菜只喺以橄欖油撈勻，略嫌單調少少，但入口爽脆，味道則主要靠其他食材提升，吞拿魚鮮甜好食，因為加上黑白芝麻。
餐湯有兩款：雜菌湯或干邑龍蝦湯，相信絕大部人都會揀晒兩款，既費事煩，又可以試晒。
雜菌湯
初時以為喺一般常見嗰類忌廉湯，但原來唔喺，唔止以雜菌碎打成，湯內仲有好多雜菌粒，所以，稱得上喺菌香撲鼻，不過，口感就唔喺以滑溜為主，反以香味取勝。配上一小件蒜香十足，香脆可口嘅法包，單喺個湯都好易讓人有少許飽肚感。
干邑龍蝦湯
個湯輕易飲得出濃郁嘅蝦味，而且，內裡有三數粒龍蝦肉，成份無欺場。不過，仍有改善空間，就喺個湯有少少偏鹹，而且，質感滑就滑，但杰身咗啲，調稀少許就一流嘞。
主菜方面，4揀2之選，包括黑松露醬炒鮮雜菌寬條麵、酥炸軟殼蟹椰汁燴飯、西班牙黑毛豬薄餅、海鮮香辣橄欖蒜片意大利麵；又或可以+$200轉為2人分量嘅海鮮西班牙炒飯。朋友知小弟心意，就喺一定揀意式燴飯，另外，再選上意菜經典之一香辣橄欖蒜片意大利麵。順便講講服務，不時添水依啲喺基本，侍應有禮又快手，而已，店內侍應足，唔會叫極都無人理，再者，無論上頭盤、餐湯，抑或主菜都喺同步，唔會相隔好耐前後腳，更逐類逐類上，唔會堆到一枱都喺又頭盤，又湯，非常貼心。
酥炸軟殼蟹椰汁燴飯
隻軟殼蟹又幾大隻喎，唔似食手卷嗰啲細細隻，酥炸處理得唔錯，酥香卻不油膩。至於帶有東南亞風嘅意式燴飯，上枱已聞到椰香，飯粒食落煙韌，屬水準之內，如果下多少少椰奶，做得再濕潤啲，個人覺得效果更好。
海鮮香辣橄欖蒜片意大利麵
唔止個燴飯份量足，碟意大利麵亦不少，其實食到依度都8成飽，個二人餐絕對夠三個人食。講番個意粉，睇見成隻紅椒仔，入口果然辣勁百份百，蒜香又十足，麵條口感啱啱好，有咬口，落海鮮料嘅份量亦唔手軟，有鮮蝦、青口、墨魚仔，質素唔錯；唯一美中不足喺橄欖油落得少，個粉食落感覺較乾身，有啲似港式嘅炒意粉。
最後，喺甜品登場，一喺就每日精選窩夫，一喺就奧利奧曲奇意大利芝士餅，寫到明「揀一」，而朋友唔鍾意太重芝士味嘅嘢，所以就揀前者，但一嚟就嚟兩份窩夫，真喺估佢唔到添。
每日精選窩夫
貫徹抵食夾大件嘅作風，份甜品都無迤做，賣相花過心思，唔喺就咁得件窩夫，仲有一球朱古力雪糕配脆口雪糕筒，件窩夫又加有Oreo 夾心餅同班尼士朱古力餅，但啲吉士醬就做得麻麻，太杰撻撻，幸而窩夫脆身又有蛋香，沾點雲呢嗱醬仲好食啲，班尼士亦都濕潤香濃好味。
即磨咖啡
Espuma賣嘅喺咖啡一向不俗，自家烘焙嘅西班牙咖啡豆，做成即磨咖啡，味道會較甘苦，小弟就喜歡加多少少奶。而啲奶唔單止熱過嚟，仲喺打起咗少許奶泡，真有心。
個二人餐如果兩個人嚟食，應該食唔得晒要打包走，三個人就啱啱好，圍起上嚟就變咗每人二百多，唔嘥嘢之餘仲划算好多。
個人評分
味道：7/10
環境：8/10
服務：8/10
抵食：7/10
平均每人消費：HK$215
環境：8/10
服務：8/10
抵食：7/10
平均每人消費：HK$215
餐廳資料：
Espuma
灣仔皇后大道東202號QRE Plaza 25樓
2151 9126
Espuma
灣仔皇后大道東202號QRE Plaza 25樓
2151 9126
沒有留言:
發佈留言