Natural Chiffon：輕盈之芳

除咗食自助餐、放題可以一次過食到幾十樣嘢之外，仲有咩機會可以會咁？就喺老婆教會一年搞兩次嘅感恩愛筵，以家庭為單位，每個家庭帶一款食物嚟，冷盤、熱食、甜品、生果……乜都得，自家製當然無任歡迎，買現成嘅亦無問題，小弟近年都懶咗，都喺買現成嘅多，甚少落手落腳整。

始終喺食評，所以，個聚會要提嘅喺咁多，而今次想介紹嘅喺專賣杯子蛋糕嘅Natural Chiffon。因為晌個愛筵上，雖然有唔少甜品，不過，較為吸晴嘅就喺有人帶嚟依間店嘅迷你杯子蛋糕，由於有分店晌中環，小弟就專誠走過去一趟望望，故此，店面相片及其展示嘅產品都喺愛筵之後幾日補拍，讓個食評全面少少。

因為走去唔喺幫襯，淨喺想補影啲相，都擔心人家唔鍾意，但去到問准店員，佢話無任歡迎，隨便影，咁就影得放心好多。店舖設晌萬宜大廈商場2樓個通道上，寧寧舍舍晌中間位，一眼就望到。凍櫃內擺咗近20款杯子蛋糕，琳瑯滿目，個個造型可愛，亦見其唧花細緻。

不過，唔見上次晌教會食到嗰款，原來迷你杯子蛋糕喺唔會擺出嚟賣，喺屬於禮盒型嘅預訂產品，亦都分為幾個系列：雜綿（$178）、字母（$198）、優惠裝（$640）及節日版（$248），全部都要最少3天前預訂。

雜綿迷你杯子蛋糕 $178

每一盒共有5款口味，都喺指定咗，而每款口味都有5個，即喺一盒共有25件迷你杯子蛋糕，整齊排列，加上色彩鮮明，女生第一眼睇見好可能嘩嘩聲嘅感覺。雖然心想一次過試勻5款，由於盒迷你杯子蛋糕喺俾所有人分嚐，故此，只揀咗感覺最吸引嘅藍莓。

件藍莓迷你杯子蛋糕拎上手真喺幾的骰可愛，正所謂細細粒，容易食，面層嘅藍莓忌廉好輕盈，唔會有種好膩嘅感覺，而且，藍莓味亦非常突出，甜甜哋中滲出微酸，至於下層嘅牛油蛋糕，做得不俗，有牛油香，夠挺實。

盒面仲標明「品嚐無添加的天然美味」，相信佢嘅出品都喺相對健康之作。拉平均每件7蚊多少少，感覺上又唔算貴。而且，買一盒同晌啲連鎖餅店訂個一磅裝蛋糕都差唔多價錢，所以，作為開派對或慶生用都幾唔錯，又可以等人一次試到多款味道。遇上特別日子，揀字母版或節日版，必定可以氹人歡喜！

個人評分
味道：8/10
環境：7/10
服務：8/10
抵食：8/10
平均每人消費：HK$0

餐廳資料：
Natural Chiffon
中環德輔道中60-68號萬宜大廈商場2樓Venue C
5404 1461