東海堂 Arome Bakery：情熱的西瓜？

兩年前同班朋友仔大出血去咗一趟肯雅旅行，今年暑假其中一對夫婦再次踏足，小弟呻窮就梗喺無跟住去啦，不過，睇佢哋嘅靚相就相當有興趣喇！所以，我哋幾家人又約埋出嚟聚一聚，食飯、傾偈、兼睇相，飯局嘅餸菜家家負責一、兩樣，小弟整咗盆大蝦芒果沙律，另加飯後甜點，而各人嘅準備都好豐富，包括：煙三文、風乾火腿配哈蜜瓜、腰果醬餅乾、烤雞鎚、燒羊架、鮮蝦蕃茄意大利粉，老友仲預備咗支白酒共酌，共渡一個愉快嘅晚上。

甜點雖然喺由小弟負責，不過，都喺買現成貨，啱啱路過東海堂，被櫥窗嘅「真夏の果實」蛋糕系列所吸引，細細個，又幾像真，成個系列有5款：西瓜の情熱、巨峰の盛宴、極檸の味惑、赤莓の動心及蜜瓜の甘熟，小弟就覺得西瓜造型最可愛，維妙維肖好抵死，所以，就揀咗佢。

西瓜の情熱 $118

打開個包裝盒，朋友都覺得佢個樣夠得意，不過，啲西瓜紋喺印晌外圍嘅膠條上，拆咗張膠條，個蛋糕成個「斑蘭」樣咁，但就無乜味，只喺加入食用色素嘅海綿蛋糕。

切開清晰可見個蛋糕分開多層，由上而下喺西瓜果凍、雲呢拿慕絲、海綿蛋糕、西瓜果肉、雲呢拿慕絲、杏仁蛋糕，當然，仲有少少幾粒朱古力脆珠扮西瓜核放上餅面。

味道又如何，西瓜果凍做得幾清爽，而雲呢拿慕絲好香滑，西瓜果肉原來真喺用上果肉，多汁清香，下面隔多層慕絲又唔會整濕底層嘅杏仁蛋糕，整體嚟講個配搭幾新鮮，味道清新，為夏日發放點點涼意。

講少少個食評標題「情熱的西瓜？」，用咗個「問號」，因為食完之後，冰爽嘅感覺就有喇，情熱何來就唔知（點解唔喺「熱情」呢），哈哈，依家啲蛋糕名都喺懶作得靚架啦！

個人評分
味道：8/10
環境：6/10
服務：7/10
抵食：8/10
平均每人消費：HK$15

餐廳資料：
東海堂 Arome Bakery
太子西洋菜南街258-260號長寧大廈地下B2舖
2749 9755