榴槤貴族 Mr. Durian：榴心柔

好多謝朋友嘅錯愛，知道小弟都喜歡食榴槤，雖然未至於喺榴槤死粉，但絕對愛煞這種「芳香」，就訂咗個貓山王一嚐。

睇見個果椗嘅標籤，原來喺嚟自網購店「榴槤貴族」（Mr Durian）嘅出品，仲標明喺源自馬來西亞。

睇完官網一遍，先知個榴槤嘅來歷咁堅，亦都學咗好多嘢。原來佢哋嘅賣點喺標榜由馬來西亞直接進口，皆因自家設置榴槤農場，兼且所賣嘅喺原個樹上完熟貓山王榴槤。仲要保證榴槤從樹上落地後三日內送到顧客手上，務求提供最新鮮、最優質嘅榴槤俾顧客，睇落都非常吸引！

雖然網頁對唔同大細嘅榴槤都標示一個參考價（4-7磅，$349-$499），但售價都以確實重量計算。小弟手上依個就重1.53kg，賣$275，換算番就成$80一磅。

先講佢個氣味先，包咗好多層報紙，再前後用兩個膠袋密封佢，一樣擋唔住佢啲香氣。所以，一打開，絕對喺榴槤「獨」氣，嗰種獨突嘅榴槤香一湧而出，仲非常強勁，鍾意榴槤嘅人梗喺無問題啦，唔鍾意嘅人真喺即暈囉，哈哈！

咪以為開榴槤好難，一般家用菜刀已經可以搞掂佢，就算徒手處理都可以，當然載隻勞工手套就安全啲。斬開一半之後，其後就好易開，唔知喺咪因為樹上完熟，就咁搵手搣開都OK！最後，一共開咗5瓣出嚟，拆成一大碟貓山王。

啲貓山王榴槤色澤金黃，極有光澤，跟晌超市啲暗啞貨色絕對無得比，而香氣就唔在講，未打開都咁勁，拆出嚟嘅果肉更不得了，此外，果肉肥厚，拎起手軟軟腍腍，入口柔滑香甜，榴槤嘅幽香十分濃郁，叫人越食越滋味，唔覺唔覺就食晒成碟，實在美味。

至於相關嘅榴槤知識，點解要食樹上完熟？點解有啲榴槤又咁平？點解泰國榴槤唔賣樹上熟？食榴槤有乜好？上上官網睇吓就知點解（www.mrdurianhk.com），小弟就無謂罰抄一次！

個人評分

味道：9/10
環境：- /10
服務：- /10
抵食：7/10
平均每人消費：HK$90

餐廳資料：

榴槤貴族 Mr. Durian
火炭山尾街31-35號華樂工業大廈第二期D座16樓41
2603 6223