因為個別好姊妹已曾到訪過「鉄人旨花」，品嚐過其刺身、壽司，覺得質素上乘，服務又好，上次見人食鐵板燒狀甚吸引，所以，今次都一於埋位食鐵板燒。由於小弟都喺首次嚟，所以食乜都無所謂。鐵板燒晌日菜裡邊，都屬於高消費，跟食懷石料理可謂不相伯仲，有時，甚至會更貴。
餐廳環境非常闊落，裝修亦較摩登，又加少少水泥牆身嘅粗獷元素。一入門口靠右喺壽司、刺身吧位，再入到尾喺鐵板燒枱，此外，仲有一個鐵板燒廂房。
鐵板燒有一人套餐（8道菜，$688 + 10%），亦有二人套餐（8-10道菜，兩個人計，$1,488-$2,288 +10%），散叫嘅當然亦得。當然，講唔上「豐儉」由人，但睇過、試過，食材確喺甚具質素，而且，又可以欣賞師傅即場烹調嘅手藝。最後，因為套餐內嘅食材有部分唔啱食、或唔食得，所以，以散叫為主。
鐵板燒一人套餐
鐵板燒二人套餐
鐵板燒散點菜式
野菜沙律 $68
準備迎接美食之前，先上一道以羅馬生菜、珍珠筍、蕃茄所做嘅野菜沙律，簡簡單單卻新鮮味美，尤其個以豆腐新鮮磨製而成嘅豆腐汁，豆腐味香濃，幾特別；再伴一小碟漬醃蘿蔔絲，糝點芝麻，清清爽爽。
北海道帆立貝 $200
第一道上場嘅鐵板燒菜式就喺北海道帆立貝，餐牌標價喺$150一客，但只有3件，無理由其中一位無得食架，放心，店家可以彈性處理，只按比例收番$200四件。以茄子作為配菜，帆立貝香煎後，再淋上蛋黃沙律醬，火炙過後，灑上些微香草粉，唔止賣相得，味道跟口感一流，肉厚爽彈，鮮味突出。
日本廣島蠔 $150
一客四件，一人一隻未免太少，所以，兩客份量先滿足到大家。廣島蠔簡單香煎後，再加入炒過嘅煙肉粒、洋蔥粒，再灑上大量蔥花，雖然賣相亮麗，但個人稍嫌搶咗少少蠔味，幸而煎過嘅蠔都仍有番咁上下大隻，啖啖蠔肉。
大蝦 $198
一客大蝦有兩件，欣賞師傅煎蝦已經喺一件賞心悅目嘅樂事，因為實在好考功夫，去殼挑腸，單靠一支叉，一把刀，就完美咁完成。大蝦煎得金光閃爍，蝦肉彈牙爽口，充滿牛油香味，蝦頭帶有少少蝦膏，豐腴味鮮，真喺好睇又好食嘅一道菜式。
大鮑魚（時價，$900起）
鮑魚跟龍蝦喺店內兩樣唯一以時價售賣嘅食材，眼前依份大過我手掌有多嘅大鮑魚，捧出嚟過過目都覺得震撼，定價要$1,380，所以食鐵板燒實在唔平得去邊。師傅先將鮑魚去殼，起好鮑邊，將鮑身本體薄切加牛油、下白酒煎，再以鹽及黑胡椒，少少醬油調味，啲鮑片厚薄均一，好軟腍，又充滿牛油香，正呀！咪以為啲鮑邊位起走咗唔要，一樣煎嚟食得，口感跟鮑片好唔同，入口煙煙韌韌，有嚼勁，真喺一菜兩食，食得津津有味。
鹿兒島黑豚 $280 / 一份（200g）
啲鹿兒島黑豚望落好似啲煙肉咁款，當然身價唔能夠相提並論，雖然睇落有啲肥，但煎好後又唔覺油膩。肉味幾濃郁，而處理上亦較之前幾道菜濃味，配菜有翠玉瓜、鮮冬菇、紅椒，其實用嚟之後伴飯食都好啱。
鯛魚湯 $78
試過多道鐵板燒菜式，喺時候以一小碗鯛魚湯潤澤一下。以味噌汁為湯底，加有一小片鯛魚、豆腐、昆布，而湯中嘅麵豉味香濃。慣性餐前飲湯，原來鐵板燒會輪到臨尾先上，一道濃香嘅麵豉湯，和暖入心。
炒飯 $138 / 份
散點嘅話喺每份以兩人份量計，所以，唔喺太大飯癮，又或覺得夠飽，大可點一客幾個人分享。炒飯簡單以煙肉粒、甘筍粒、洋蔥粒、雞蛋炒製，飯粒炒得乾爽，珍珠米圓潤煙咬口。
紅豆雪糕 $38
最後，一小杯紅豆雪糕作結，雪糕嘅紅豆味濃郁，口感軟滑，又有紅豆粒，清新香甜，雪糕下仲有少少香脆粟米片，又幾好食喎。
由於一張鐵板燒枱都可以坐唔少人，若同一張枱有幾組客，咁就要有心理準備「慢慢」嘆，因為師傅真喺要啲時間逐道菜為大家做，不過，當睇表演其實時間都好快過。
個人評分
味道：9/10
環境：7/10
服務：8/10
抵食：7/10
平均每人消費：HK$1,060
味道：9/10
環境：7/10
服務：8/10
抵食：7/10
平均每人消費：HK$1,060
餐廳資料：
鉄人旨花 Shika Teppan-Yaki
銅鑼灣謝斐道477-481號肇明大廈2樓
2892 8819
鉄人旨花 Shika Teppan-Yaki
銅鑼灣謝斐道477-481號肇明大廈2樓
2892 8819
沒有留言:
發佈留言