食品安全喺生產過程嘅重要一環，據介紹，由飼養至生產，過程中並無添加生長激素或防腐劑，亦會採用非基因改造成份嘅飼料，唔含化學肥料或農藥，所有產品務求做到是天然，不含人造色素或香料；而且，每個農場亦受到丹麥環境部門不時嘅評估審查，以確保遵循歐洲及丹麥嘅有機標準飼養及生產；再者，從農場、屠宰至運輸等每一個環節，都做到全程可追溯嘅有機監督。搞咁多嘢，都喺想做到品質有保障，所以，獲得歐盟有機（EU）認證、美國農務部有機食物認證標籤（USDA）及全球紅肉標準（GRMS）認證，絕非僥倖。
有機食材跟一般食材，晌味道、質感都可能分別唔大，但志在求個安心。如果想試試佢哋啲產品（有機豬腩扒、有機無骨豬扒、有機豬肋骨及有機豬梅頭扒），都可以晌本地一啲大型及高級超市如：百佳超級廣場、一田超市、City Super……等等搵到佢嘅芳蹤。
阿根廷藉大廚Pancho Barria示範烹調嘅有機豬肉菜式：希臘蜜糖檸檬豬扒及意式香醋豬扒，兩款都非常吸引，可惜有得睇，無得食，因為午宴本身已預備好其他菜式。
朱蘊晶醫生分享女性健康資訊，咪以為小弟身為男人唔關事，家中有老婆，身邊又有唔少上年紀嘅親友，一樣可以了解吓。
最後一個環節喺江美儀嘅健康飲食心得分享，電視、真人一樣咁靚，估唔到佢講嘢咁生鬼，而且，都有唔少實用心得，真喺揀啱人選。
午餐會安排咗多款美食，有前菜，幾道主菜、伴菜，唔少得眾多女士喜愛嘅甜品，非常豐富，當中幾道主菜，均以今日介紹嘅歐盟有機豬肉炮製。
煙三文魚配紅菜頭醃三文魚配薯仔香草沙律
前菜以一道瑰麗嘅「鴛鴦」三文魚為午餐會揭開序幕，賣相既搶眼，又精緻。三文魚頗鮮味，煙燻嘅沾一點芥辣，效果不俗；而紅菜頭醃嘅，多一份紅菜頭汁嘅清甜味，的確喺好清新健康嘅開胃菜。
大會預備咗3款主菜供大家共享，分別有豬仔骨、豬肉包及煎豬柳，食過前菜，大家都熱熾期待幾款主菜嘅登場。
德國黑啤燴歐盟有機豬仔骨配香草芥末汁
雖然加入咗黑啤，但唔會有咩醉意，因為感覺啲黑啤都揮發得八八九九，主要令啲豬仔骨色澤燴得更靚，而肉質極之鬆化，又夠晒入味。香草芥末汁有啲似燒汁，不過，多一朕芥末香，而帶微辣，好啱食肉獸嘅朋友。
手撕歐盟有機豬肉包配半乾西紅柿無花果醬
以迷你漢堡包作為造型，嬌小可愛，因為試菜開係，所以一碟先有8個咁多。包身脆口富麥香，裡面嘅手撕豬肉口感十分鬆軟，加入嘅半乾西紅柿無花果醬，味道清甜，醬汁啱啱好，唔會太濃，又唔會太多汁而整腍個麵包，絕無影響個口感。
厚切歐盟有機豬柳配燒蘋果及珍珠洋蔥
最後一道主菜「有機豬柳」，以厚切形式處理，所以，入口略嫌有啲嚡，但豬肉味濃喺無可否認。反而，配菜嘅燒蘋果及珍珠洋蔥先得小弟歡心，因為前者以青蘋果連皮煮，酸酸甜甜，好清爽；後者珍珠洋蔥，爽爽甜甜，又有少少焦香。
主菜以外，多款伴菜都同樣精彩，是次午餐就安排好5款伴菜，包括薯蓉、燉捲心菜、意大利青瓜、忌廉青豆及穀物沙律，而預定餐牌中嘅德國麵糰（Spatzle），好可惜未有出現，未能一嚐依款「德國蟲仔粉」。
伴菜均以小碗或小砵形式呈現，以伴菜而言，份量十足，各有特色，難得又好好食。最得意喺穀物沙律，除咗有啲豆類穀物，混和咗一啲青瓜粒，淋上少少酸忌廉醬，清新好味。
黑櫻桃芝士蛋糕配杏仁汁香草雪糕
一諗起德國經典甜品，非黑森林蛋糕莫屬，不過，是日結尾嘅甜品唔喺黑森林，但一樣用上黑櫻桃所做嘅黑櫻桃芝士蛋糕。蛋糕本身嘅造型已經夠精緻立體，初時以為只有晌表面加有黑櫻桃，原來內布乾坤，芝士蛋糕內亦藏有黑櫻桃，況且，芝士蛋糕又柔滑香濃，「芝」味無窮。其他細節位，如以雲呢嗱條所做嘅雪糕球，雪糕球上嘅蜜糖脆粒，清甜芳香嘅杏仁汁，都一絲不茍，實在好食。
好愉快嘅一個下午，因為唔單止品嚐美食，更重要喺有機會多了解一個有機品牌及其生產故事。黑心食材時有所聞，大家都非常關注食材嘅安全，但願人人食得健康，餐餐食得安心。
個人評分
味道：9/10
環境：9/10
服務：8/10
抵食：-/10
平均每人消費：HK$0（品牌推廣活動）
環境：9/10
服務：8/10
抵食：-/10
平均每人消費：HK$0（品牌推廣活動）
餐廳資料：
Berliner German Bar and Restaurant
灣仔軒尼詩道314-324號W Square 4樓
2891 8689
灣仔軒尼詩道314-324號W Square 4樓
2891 8689
沒有留言:
發佈留言