奇華餅家 Kee Wah Bakery：好友狂嚐曲（34）

近日晌飲食雜誌睇到過奇華嘅「復活節禮盒」廣告，仲記得嚿年有食友送過我一盒奇華「復活節禮盒」，長形小鐵盒白底加色彩繽紛卡通圖案，內有老薑餅、朱古力蛋卷、手製杏仁小紅莓鳥結糖同埋手製南瓜籽脆糖，一盒多元化嘅奇華零食，估唔到咁快又一年。

最近，又意外地收到另一位朋友送贈嘅奇華「復活節禮盒」（$88，從雜誌見到標示嘅零售價），雖然內裡都喺一啲奇華嘅招牌零食，不過，今次嘅包裝有啲唔同。長方米白色紙盒內有兩人個可愛嘅「牛奶罐」，一個印有小兔，另一個印有小雞，別緻可愛，又有種大地回春、生機處處嘅感覺，而個牛奶罐亦都挺實用，可以放吓小飾物，甚至乎做個筆筒都無妨。 

打開「小兔牛奶罐」，裡面放滿朱古力粒朱古力曲奇及提子燕麥曲奇，全部獨立包裝，乾淨衛生，每一款味道各有5件。以前曾食過佢啲曲奇，再食番，水準不變，鬆脆度十足。 

前者朱古力粒朱古力曲奇嘅朱古力味香濃，朱古力粒粒混在其中就更濃郁； 

後者提子燕麥曲奇混和咗提子乾及燕麥，粗糙而有咬口，感覺少甜，健康清脆。

另一個「小雞牛奶罐」，裡面盡是一條條手製椰絲花生軟糖、手製南瓜籽脆糖及手製杏仁小紅莓鳥結糖，同獨立包裝，確保衛生，而每款味道各有4條。 

手製椰絲花生軟糖 

較傳統嘅一款零食，花生軟糖滿佈椰絲，味道香甜，每口都喺細路仔時嘅回憶，入口煙煙韌韌，柔軟而有咬口；

手製南瓜籽脆糖 

主要以南瓜籽及麥芽糖所做，做得酥脆香甜，極之脆口，再者，南瓜籽本身對人體有益，可降血脂，屬健康食材，只不過加有麥芽糖，當然不要一次食太多；

手製杏仁小紅莓鳥結糖 

鳥結糖清甜煙韌，質感帶黏，奶味香濃，混入唔少甘香嘅杏仁粒及微酸嘅小紅莓，自不然味道變得更富層次。

由於禮盒中都有兩款喺曲奇，故此都放埋入「好友狂嚐曲」系列當中。以上分享嘅5款零食，都各有特色，討人歡喜。唔知你喺唔喺趁着節日喜歡送禮物嘅人，如果喺而未諗到買乜，依個奇華「復活節禮盒」啱心水嗎？趁着復活節，不妨跟朋友或家人分嚐一下啦！

個人評分

味道：8/10
環境：-/10
服務：-/10
抵食：-/10
平均每人消費：HK$0（禮物）

餐廳資料：
奇華餅家 Kee Wah Bakery
荃灣青山公路398號愉景新城1樓38號舖
2498 8212