許留山 Hui Lau Shan Healthy Dessert：中留砥柱

若非晌isquare無咗滿記，相信都未必會過嚟許留山。其實，個人嚟講都幾鍾意許留山嘅甜品，主要都喺佢嘅芒果系出品，不過，近年都甚少幫襯，今晚，就趁著晌PizzaExpress慶祝細佬生日食完飯，就以許留山甜品作結。

港式嘅甜品店一大特色，就喺夠逼，真喺10間有10間都喺咁，許留山都唔例外，啲枱櫈排得密到呢……，而且，櫈亦好「纖巧」，大件頭啲都坐唔落。而店舖本身呈窄長形，加埋枱櫈，幾有種壓逼感，務求期望大家「合作」吓，嚟得快，食得快，走得快！

如果唔喺頭頂塊招牌寫住「since 1960’s」，差啲唔記得佢喺老店嚟。講開許留山，佢都算個傳奇，由一間元朗涼茶鋪，轉轉吓型，憑獨創嘅芒果西米撈，成為街知巷聞嘅港式生果甜品店，分店仲多達50家，並吸引唔少旅客朝聖，都可謂喺港式甜品店嘅中流砥柱吧！

依家好多店都鍾意晌餐牌列上「十大必食」，姑勿論喺宣傳技倆，抑或店方真心推介，都不妨當個參考。

芒之戀 $57

小弟一向多心，所以，就揀嚟依份「芒之戀」芒果甜品拼盤，一次試到3個甜品，猶如一份三角戀，包括：「芒果糯米糍」、「多芒小丸子」及「多芒亮晶晶」，賣相一片鮮黃，更勝在大堆頭。多人食可以互相分享，一人獨吞就滿足非常。

 - 芒果糯米糍，加入芒果汁做嘅糯米皮軟糯，內藏一大粒芒果肉，而伴碟仲有好多芒果片，真喺滿口芒果清香；

 - 多芒小丸子，以鮮芒果汁底，加入芒果肉小丸子，丸子煙煙韌韌有咬口，相信可以滿足到芒果狂熱份子；
 - 多芒亮晶晶，據店員講透明嘅「水晶條」喺自家以植物纖維創製，入口滑嘟嘟，配合新鮮芒果肉及芒果雪糕球，冰涼清甜。

芝麻流心燕窩燉蛋白 $45

細佬見個燉蛋白有「流心」，就好想試吓佢。估唔到有幾多燕窩，雖然都喺啲碎濕濕嘅碎燕，但幾十蚊貨仔你仲想點，至少每啖蛋白都撈到點燕窩，心裡都好好多。蛋白燉得唔錯，滑溜，清甜，不過，「流心」芝麻晌晒底，而且得好少。

紅豆流心燕窩燉蛋白 $45

老婆都想要個熱嘅，燕窩燉蛋白就最啱佢，佢一向偏愛紅豆多啲，所以揀咗紅豆流心燕窩燉蛋白，大概你都估到，所謂紅豆流心都只喺蛋白底下加有紅豆沙，「流心」又未免取巧少少。

西米粒粒芒果 $38

細妹對食嘅甜品一般般，反而揀杯西米粒粒芒果飲吓，無飲過，難評論，不過佢話杯嘢好夠芒果味，粒粒西米啜得過癮，又有鮮芒果肉嗒吓。

事隔多年，再次到訪，感覺無以前咁大眾化，其實，近年甜品店嘅競爭非常激烈，唔少小店都絞盡腦汁，各出奇謀，甜品嘅款式層出不窮，變極都有。睇番許留山，同樣晌唔同季節都推出唔同新嘢，面對汰弱留強嘅現實，甜品生意一啲都唔易做！

個人評分
味道：7/10
環境：5/10
服務：6/10
抵食：7/10
平均每人消費：HK$46

餐廳資料：
許留山 Hui Lau Shan Healthy Dessert
尖沙咀樂道9號地舖
2369 7918