Honey Creme：韓蜂襲港

繼韓式烤肉、炸雞，「蜂巢雪糕」會唔會引起另一波韓風美食？聽食友講，其實蜂巢雪糕早已晌7月登陸咗香港，不過，據說喺A貨嚟，因為小弟無親身去試，實難評論好壞。最近，由中韓合資創立嘅蜂巢雪糕品牌「Honey Creme」，3月晌台北創立，5月再南下高雄，卒之9月13日晌香港插旗，繼續引進韓國熱賣嘅「蜂巢雪糕」，其後仲會晌新加坡、澳門開店。有幸率先一嚐原裝真味，兼唔使飛到韓國或台灣都試到，實在「蜂」騷！

小店位處銅鑼灣利利園山道，鋪仔細細，以外賣為主。黑木板襯白磁磚，最搶眼當然喺玻璃飾櫃上七彩繽紛嘅雪糕筒樹啦，此外，玻璃櫃內一舊二舊嘅蜂巢絕對喺另一焦點，嚴選紐西蘭國家認證嘅100%純天然頂級優質蜂巢，貨真價實擺在面前，定必引人註足望多兩眼。

除咗色彩繽紛嘅雪糕筒，就連啲小匙羹都五顏六色、色彩鮮艷，情侶嘅，一杯兩份食幾甜蜜呀，父母跟仔女嘅，又可以你一啖我一啖，幾咁溫馨呢！

現時店方共提供11款口味，分別喺原味、蜂巢、蜂蜜、濃縮咖啡、有機棉花糖咖啡、有機棉花糖、有機混和穀粉、岩鹽黑巧克力淋醬、巧克力球、長崎蛋糕、焦糖爆米花，均以透明膠杯盛載，定價為$32-$42。而其中有7款口味（原味、蜂巢、蜂蜜、有機棉花糖、有機混和穀粉、岩鹽黑巧克力淋醬、焦糖爆米花）同時供應甜筒裝，價錢其實跟杯裝一樣。此外，仲可以額外添加配料，蜂巢加$10，其他都喺多加$6，不過，為顧及味道嘅配搭，添加配料只限同款口味，即喺點選焦糖爆米花，只可額外添加番焦糖爆米花，唯獨蜂巢、蜂蜜可互配。香港人接受能力強，又喜歡試新嘢兼左配右搭，真希望有機會放寬此限。

蜂巢冰淇淋 $42

既然喺招牌，又真喺無理由唔先試。據介紹，雪糕喺選用本地鮮奶，再配合韓國頂級有機牛奶冰淇淋專利配方製成，聽起嚟好虛，但一食雪糕口感綿密細滑，有種好豐厚嘅感覺，奶味非常濃郁；而金黃閃亮嘅蜂巢，入口煙煙韌韌，蜜潤清甜，讓人好有種自然嘅甜蜜滋味。題外話講講，蜂巢不單為蔗糖含量少，佢嘅營養成分比起蜂蜜高，仲要含多種礦物質，唔怪得被形容得咁滋補養生啦！

岩鹽黑巧克力淋醬冰淇淋 $38

「甜 + 鹹」又會喺點呢？店員先晌杯內唧上黑朱古力漿，再唧入軟雪糕，後加多一朕黑朱古力漿，灑上即磨岩鹽，就成為依款岩鹽黑巧克力淋醬冰淇淋。晌柔滑嘅雪糕中，有少少甘苦嘅黑朱古力香，又嗒到岩鹽所帶嚟鹹鹹哋嘅趣味。不過，由於岩鹽喺後加，並非晌做黑朱古力漿時加入岩鹽，所以，只有雪糕面一層有實在嘅鹹味，後段就成了齋食軟雪糕而已。

香港店將於9月13日1:00pm正式開幕，既有買一送一優惠，又有Facebook、Instagram送免費贈劵活動，相信屆時吸引唔少雪糕「粉絲」。

想了解更多，可去有關官網睇睇：www.honeyicecream.com.hk，欲知最新動態，Facebook : Honey Creme - Hong Kong或Instagram : honeycremehk都能知得更多。

個人評分

味道：9/10
環境：7/10
服務：8/10
抵食：8/10
平均每人消費：HK$0（試食邀請）

餐廳資料：

Honey Creme
銅鑼灣利園山道34號地下
3525 1564