大快活 Fairwood：快活下午茶

上次就一支公落街買餸兼行公園，晌「銀龍」食咗個好流嘅菠蘿油，今次兩公婆行完公園，老婆口痕就話不如食個下午茶，就揀嚟咗「盈暉薈」嘅「大快活」，因為一嚟等陣會晌隔離嘅「百佳」入貨，二嚟就喺呢間「大快活」地方超大，卻喺特別少人，疫情之下，坐得更安心。

入門口，照例有量體溫，備有消毒搓手液，入到裡面，枱與枱之間都加咗隔版，再者，地方大，顧客都自動波隔開枱咁坐。

下午茶餐選擇非常之多，有平有貴，由於一開始無打算食下午茶，之前嘅午餐時段都有食正餐，所以，就點咗一個下午茶餐，再加配一份湯麵。

見到有款所謂特色湯粉麵，好似幾OK咁，又可以配雞脾，再加錢額外配碗迷你粉麵，夠晒過吓下午茶癮。

迷你扎肉胡椒湯米線+蜜味燒雞脾 $39、雪菜肉絲上海幼麵 +$7.5

雖然個胡椒湯米線寫明喺迷你，但睇落都有番咁上下大碗，而且，碗面加咗一大抹胡椒醬料，胡椒香四溢；隻燒脾亦好大隻，燒得金黃，睇落唔錯喎。

迷你扎肉胡椒湯米線

上面都講到胡椒嘅香氣四溢，真喺捧餐時已聞到，不過，就真喺過辣，辣到有啲嗆喉，小弟唔食得辣就咁講啫，但連食得辣嘅老婆都話啲胡椒辣勁好狠吓。除此之外，其實，個湯米線都無咩問題，扎肉跟湯米線都唔喺次等貨。

蜜味燒雞脾

至於隻雞脾為個下午茶餐搶回唔少分，一來夠大隻，夠份量，因為有啲餐廳將貨就價，啲雞脾細到好似未發育咁；二來醃得入味，又燒得香，而且，咬落肉質軟腍，意外地好食喎。

雪菜肉絲上海幼麵

間常嚟食早餐都有試過加配佢啲上海幼麵，感覺唔差，又只喺加多$7.5，睇樣你都見喺交足貨，而且，啲麵條咬落有韌性，雪菜肉絲味道啱啱好，唔會過鹹。

熱奶茶

有啲人話「大快活」啲奶茶最滑，有啲又話「大家樂」嘅奶茶最好，當然，兩間嘅奶茶都唔喺我心目中嘅最好，但「大快活」嘅奶茶算唔差，口感就稱唔上細滑，但茶底都算夠醇香。

估唔到嚟食咗下午茶無耐，隔多個星期同老友行完山，沿石梨貝水塘落九龍接收水塘，再經長坑村返到嚟美孚，就不如食個下午茶，再吹吹水先散。今日再嚟，可能接近下午茶市完（因為疫情關係，茶市5:00pm就完，跟住就轉晚市），成個場都無乜人。

迷你熱狗、粒粒紅豆冰 $27

行完山，個心最想念就喺紅豆冰，所以，一眼就晌配紅豆冰系列嘅下午茶餐度揀，結果，就選咗配熱狗。出嚟嘅樣唔錯喎，紅豆冰大大杯，熱狗條腸亦有番咁上下，唔覺會喺將貨就價。

粒粒紅豆冰 

先講講紅豆冰，上文都講過杯紅豆冰大大冰，但打橫睇，堅有近半杯喺紅豆，可能臨近茶市完，賣大包清埋啲貨，最正喺啲紅豆又清甜，有腍身，配上冰涼嘅奶水，入口爽晒，真喺好飲好食。

迷你熱狗

再嚟睇睇隻熱狗點先，包身烘過，所以，好軟熟，而幼長嘅香腸唔喺白烚，喺輕輕煎過嚟，咬落腸衣仍有點脆口，雖然只喺加入普通嘅沙律醬，伴點生菜絲，但都比預期中好食。

夾番兩次嘅體驗，「迷你熱狗、粒粒紅豆冰」下午茶餐絕對值得俾個讚好佢，但個「特色湯粉麵」下午茶餐就因為碗胡椒湯米線拖累，拉低晒啲分，不過，整體而言，小弟仍覺得值中上嘅分數。

個人評分
味道：7/10
環境：7/10
服務：7/10
抵食：8/10
平均每人消費：HK$27

餐廳資料：
大快活 Fairwood
美孚景荔徑8號盈暉薈2樓218-222號舖
2856 8680