百味車仔麵：味盡人意

今周日得夏總兩公婆蒲頭，人少少，就落太子食車仔麵，其實，每次聚完會落太子食晏，都喺其他人話事多，我就絕少會俾意見，反正我就真喺乜都食。

入嚟到「百味車仔麵」，格局猶如茶記，以賣車仔麵而言，裝修算喺高檔，內籠夠光猛整潔，牆上又畫咗少少六、七十年代嘅大排檔光景，而座位以卡位居多，亦算闊落，唔會太高「密質質」。

枱邊擺有大餐牌，但就無理到，因為一心都喺嚟食車仔麵。而餸料、麵底、醬汁嘅選擇就印晒晌張點菜紙度，一目了然。由於啲餸料款款額外再加都喺劃一收$7，所以，無乜邊款餸料有亮點，都喺比較大路。而背頁，就喺其他選擇，如飯品、小食及各種飲品。

兩餸麵 $35

餸料近50款選擇，都要花點點時間揀，由於出街食，盡可能揀啲自己唔識整或好難整嘅喇，所以就揀牛腩及金錢肚，要油麵，配沙嗲汁。

啲牛腩炆得好鬆化，但又唔算好香，而金錢肚夠軟腍，但總喺感覺唔及酒樓啲點心咁濃香。

麵底份量好足，麵條柔滑；湯底不過不失咁啦，加埋殼沙嗲汁，味道濃香啲，感覺再好啲。枱上嘅菜脯可隨意添加，有助增加啲鹹香度喔！

熱奶茶 $7

雖然午市食車仔麵無套餐之類，但跟車仔麵，飲品有半價。不過，奶茶就真喺普通啲，茶底有茶味，但唔叫得香，滑度更喺麻麻哋。

招呼就預咗都喺普普通通，咁好似你去茶記，都唔會期望有咩服務啦，所以，有啲基本禮貌，快手快腳上菜、執拾，已收貨。總括嚟講，「百味」嘅車仔麵，屬中規中矩啦，好突出就無喇，唔好食咩，又未至於。

個人評分
味道：6/10
環境：6/10
服務：7/10
抵食：7/10
平均每人消費：HK$42

餐廳資料：
百味車仔麵
太子西洋菜街242-244號地舖
2332 4622