山區裡的走走趯趯: PizzaExpress：親情不薄

2014年9月20日星期六

PizzaExpress：親情不薄

之前幫襯過PizzaExpress好幾次，印象一向唔錯，亦知屋企人都幾鍾意食吓薄餅，趁住細佬生日，就帶佢哋嚟試吓，品嚐吓PizzaHut、PizzaBox……等等以外嘅薄餅喺點。

一早透過官網嘅網上訂位系統，方便快捷，簡單易用。而K11分店喺第一次嚟，晌商場內一個死角位，都有少少難搵。近門口被「吊起」嘅「綿羊仔」，自然成為入門口嘅焦點，其實，估唔到店內原來幾大，枱椅又排得疏鬆，感覺闊落，並無用盡每吋空間，加上我哋嚟得早，人客未多，所以，坐落令人唔會太拘束。

由於星期六晚關係，無咗平常嘅4 / 6人套餐，唯有散叫，當然唔及食套餐划算。

翻餐牌期間，發現幾款頗具中國色彩嘅熱飲：「荔枝茉莉花茶」、「玫瑰洛神甜莓茶」、「玫瑰普洱奶茶」及「桂圓紅棗茶」，明顯喺針對國內遊客，特別為「人民幣」服務咁款。

菜式基本上分為頭盤、沙律、羅馬薄餅（餅底薄脆）、傳統薄餅（較羅馬薄餅厚少少）、輕盈薄餅（薄餅中間挖空加入新鮮火箭菜）、薄餅餃、意粉等，我記得以前仲有一類叫那波里薄餅，不過已經無賣喇。

串燒香草烤雞 $58

從餐牌所見，依個「小吃一口」頭盤喺新推出，一客賣$58，兩客則$98。烤雞肉切成一口一嚿，沾滿羅勒香草醬，焦香軟腍；而碗下放有西瓜及火箭菜，前者出奇咁超甜，後者有朕芝麻味，好濃但少少偏苦，不過，仍然值得推薦嘅小口餐前小食。

蟹肉香脆包 $75

頭盤除咗上述「小吃一口」之外，又有一類叫「頭盤分享」，即大份少少足夠幾個人享用，蟹肉香脆包喺其中之一。雖叫「香脆包」，查實以脆薄餅做底，加上蟹肉、青瓜粒、乾蔥粒，配以酸忌廉、刁草汁、橄欖油；餅底以為脆，但質感煙韌，蟹肉不少，夾埋一齊有口感，又惹味，唯美中不足喺橄欖油實在落得太多，雖然話橄欖油相對健康，但太多又未必喺好事，物極必反嘛。

北京烤鴨薄餅 $134

PizzaExpress嘅薄餅不時有新奇嘢，而烤鴨薄餅屬羅馬薄餅系列，不過已經唔喺咩新嘢嚟。薄餅一睇就知喺手拉，果然夠薄、夠脆，其實味道不俗，又有焦香邊位，不過賣相麻麻，而且食得出個師傅喺hea做，一來啲烤鴨醬搽得唔勻巡，所以，有啲位置OK，有啲會過鹹，就連啲烤鴨件亦放得好「求其」，起碼一眼就見到有件薄餅之上喺無烤鴨啦。