MX2：萬變不離MX

一講美心快餐，好多人都想起「美心MX」，我家附近都有間美心MX，亦喺我同老婆經常晌星期六食早餐嘅地方。咁「MX2」又喺乜？偶然去開綠楊坊，先發現有間「MX2」，近門口仲印住大大隻標語「Take Eat Easy」，玩晒食字，就連餐紙都喺咁，希望叫人食得輕鬆。

其實，明眼一睇大概都知佢又喺美心旗下一員，雖然同樣賣快餐，但環境、落單流程跟一般嘅美心MX好唔同。最明顯，莫過於裝修，環顧成個場都睇得出花過心思，紙皮石地磚，強烈光暗對比，黑架鐵框，都顯得型格。

落單流程再搵唔到專用嘅收銀櫃台，形式似麥記，到櫃枱前落單等食物。而食物選擇再唔見晌一列水牌之上，改用大電視打出所有嘢，價錢跟其他美心MX都差唔多，無話特別貴。此外，餐具及調味品都集中晌晒一個專櫃之內。

鹽香雞‧肉燥豆腐飯 $35.5

所有明爐燒味保證自家製作，美心開咁多中菜館，所以依個唔太擔心。燒味再加插肉燥豆腐飯，算唔得咩新嘢，鹽香雞鹹香嫩滑，豆腐亦都滑溜，只喺稍嫌肉燥唔夠香，可以再做得惹味啲，整體評為不過不失。

香草豬肉腸肉醬意粉 $38.5

美心嘅鮮茄焗豬扒飯一向水準穩定，又夠質素，不過，今次改試佢個焗肉醬意粉。意粉大大碟，鋪滿肉醬，做得頗香濃，如果面頭再加多少少芝士拎去焗，相信賣相及香氣更上一層樓。意粉煮得咬口，撈勻啲肉醬味道幾好，酸酸甜甜好開胃，而多加一條嘅香草豬肉腸，腸質挺實淨，唔會霉霉爛，又富香草味，唔喺平價貨色。

即磨咖啡 +$6

所有嘢都唔包飲品，除咗個滋味全日餐，想飲嘢就熱嘅+$6，凍嘅+$9。即磨咖啡，雖然都只不過喺咖啡機製作，但芳香夠滑，只喺加$6，點會唔收貨呀！

依間MX2效法IKEA咁，特設托盤回收站，我都幾鍾意依一類安排。晌枱角印有「交回托盤，獎你食糖！」，初時驟眼以為佢吹水，咁有無糖食我都會順手幫忙交回托盤，去到托盤回收站，真喺有成兜瑞士糖隨你拎。

對MX2嘅印象，除環境感覺舒服、輕鬆啲之外（燈光柔和啲都喺有一定作用），食物嘅質素、份量、定價幾方面，跟平常嘅美心MX唔算話好大差別。因為暫時只得一間MX2，過開依頭不妨走嚟試試，相反，唔試唔會有咩損失。

個人評分
味道：7/10
環境：7/10
服務：6/10
抵食：8/10
平均每人消費：HK$40

餐廳資料：
MX2
荃灣惠荃道22-26號綠楊坊S10至12號舖
2498 0283