Nisugu：西班牙美食美景之夜

以往搭到過嚟「啟德」，一喺去「Airside」，一喺就去「Mikki」，今次唔同，嚟另一個新場「雙子匯」，離地鐵站非常近。朋友知小弟都喜歡西班牙菜，就介紹咗位處14/F嘅「Nisugu」，佢唔單喺一間西班牙餐廳，午市時段會喺間Cafe，晚市先以Bar & Restaurant形式經營。

餐廳嘅設計比較開放式，所以，基本上晌鋪外都睇到成間餐廳嘅環境，裝修採用大量弧形線條，加上柔和燈效，頗有種高雅嘅情調。

另外，外面仲有兩排露天位，若非撞啱有股寒流襲港，揀坐出面仲舒服呀，因為，一來啲座位更寬敞，全部都喺休閒4人枱，二來景觀開揚，望晒樓下成個公園夜景。

雖然主打西班牙菜，原來亦有夾上日本嘅融和菜式，而分類上，包括原鮮味海鮮、多款西班牙小食、沙律、炸物、主菜、西班牙海鮮飯、意大利麵及烏冬……等等，選擇非常多元化。

另外，嗜甜嘅客人不愁寂寞，有另一個甜品餐牌，有10多款選擇，仲不拘一國，美式、意式、日式、法式都有，當然，經典嘅「西班牙油條」梗喺唔少得啦。

至於飲品方面，同樣選擇多多，啡茶、果汁就基本啦，話明晚上華麗轉身變成Bar & Restaurant，酒精類飲品就更有更多選擇，此外，想特別啲但又唔飲得酒，一系列嘅無酒精雞尾酒就不妨試試。

Hana $68

以桂花、檸檬、梳打水溝成嘅無酒精雞尾酒Hana，漸變效果嘅賣相睇起嚟好清爽。朋友就話味道清新，又滲出陣陣桂花幽香，感覺幾特別，而且，好適合配襯一陣所揀嘅濃味菜式。

Kiku $128
而呢一杯雞尾酒Kiki，睇起嚟同杯Hana差唔多樣，但入口好唔同，因為加上蘭姆酒，仲有梨汁、青檸、蜜糖同梳打水調成，都易入口，正正唔覺酒精嘅濃度，其實對唔飲開酒嘅人會易醉。

蕃茄酸種麵包 $58

單睇個菜色名以為普普通通，其實個賣點喺啲西班牙蕃茄，喺非常之甜，啲蕃茄搓成蓉，鋪晒晌酸種麵包之上，口感好唔錯，甚具蕃茄嘅鮮甜味，而啲酸種麵包煙韌，口感又極具個性。

香烤日本南瓜沙律 $98
每一餐都加啲沙律菜式唔單止因為健康，仲可以醒醒胃，可以食到更多嘢。新鮮嘅火箭菜配上櫻桃蘿蔔同埋車厘茄，在淋上油醋作為沙律嘅基礎，而亮點就梗喺啲日本南瓜，南瓜本身又粉又甜，甚至連皮都可以食，香烤過之後暖暖地，襯埋酸乳酪，更突出到南瓜嗰份香甜味。

西班牙辣肉腸薯仔糰子 $158

早排晌金鐘食自助餐就正正試過呢一款薯仔糰子，喺意大利麵嘅一種，覺得非常特別，所以，今次再遇上就專登點嚟俾老友一試。一粒粒嘅糰子口感非常獨特，軟軟腍腍得嚟又有份煙韌感，每一粒都沾滿蕃茄醬汁，又加咗少少巴馬臣芝士碎同水牛芝士，令食味更富層次，而啲西班牙辣肉腸味道鹹香，微微辣，就更加惹味好食。

西班牙海鮮飯 $208
西班牙海鮮飯絕對喺西班牙菜嘅經典，坊間亦有唔少變奏版本，不過今晚晌度所食嘅喺傳統版本，但一樣好受歡迎，目測所見差唔多抬抬都有嗌。諗住只賣二百零蚊，唔會太大份，但送到嚟 份量絕對夠3個人食，而賣相十分吸引，無論大蝦、海蜆、青口都睇得出非常新鮮，飯粒軟綿並吸滿湯汁，再唧上檸檬汁，撈埋少少酸忌廉，非常之正。

焦糖忌廉香濃焙茶巴斯克蛋糕 $78

食到尾見大家都好好胃口，胃納仲有空間，就追加一客巴斯克蛋糕，晌呢個甜品系列有3款口味，當然焦糖喺小弟嘅「飛弗」。下層嘅焙茶芝士蛋糕做成巴斯克，不過，因為上面冚上一層焦糖忌廉，所以，睇唔到焗到好燶嘅效果，但焙茶味香濃幽香，焦糖忌廉軟滑細緻，整體嚟講非常好食。

因為安排咗我哋坐張二人枱，枱面唔喺好大，但上菜速度都會睇住我哋嘅進食狀況，所以，唔會堆到一枱都喺，我哋又可以慢慢食，食得自在，同埋整體服務都非常好，不時為我哋添上暖水，到食甜品時又幫我哋換過一套餐具，連紙巾都俾過張新嘅，而且，店員嘅態度非常之有禮，故此，令到我哋整晚用餐嘅體驗感覺都非常之舒服！

個人評分
味道：9/10
環境：9/10
服務：9/10
抵食：9/10
平均每人消費：HK$440

餐廳資料：
Nisugu
地址：九龍城啟德協調道12號雙子匯1期崇光啟德店食匯堂14樓1402號舖
電話：5722 5079