山區裡的走走趯趯: JA Kitchen：有「瀛」有格

2025年3月19日星期三

JA Kitchen：有「瀛」有格

小弟同夏總早排大家都患上氣管病，咳到甩肺，好吓又唔好吓咁，到近排總算好番晒，加上都好耐無同佢聚一聚，所以，賀一賀就約出嚟食餐好嘅。知佢最好喺日本嘢，一年總會去一次日本，故此，到訪位處佐敦「食街」文英街嘅「JA Kitchen」，呢條街你嚟過就知短短一條街仔，有成十幾、廿間食肆，咩菜系都有。

雖然睇門面帶點東瀛風，但甫入到餐廳感覺好西化，啲裝修摩登、有型，仲設有一小排吧位，不過，嗰度應該唔喺開放用餐，因為都見擺咗唔少裝飾同啲推介餐牌。

枱上嘅餐具及之後盛菜嘅器皿，都非常之靚同獨特，加上師傅細心嘅擺盤，令到單喺視覺都喺一種享受。小弟就特別鍾意個筷子托，因為喺富士山嚟，的骰可愛！

食套餐向來都喺最划算，而餐廳提供一款「tasting menu」一共9道菜嘅套餐（視乎你當個讚岐烏冬喺咪一道菜），菜式非常豐富，且多元化，定價$590一位，此外更有一種食「廚師發辦」嘅感覺，因為部分菜式只列明類別，而食材因為時令用上當日靚貨。

前菜

先登場嘅前菜以晶瑩嘅雞尾酒杯呈上，感覺亮麗，而裡面喺松葉蟹肉，再配以青瓜絲同埋三文魚籽，底下墊上水雲醋物，加埋啲食用花做裝飾，賣相實在精緻。蟹肉勁鮮甜，混埋其他食材，令味道豐富，有份先聲奪人嘅感覺。

本日海產冷盤

繼而登場喺鮑魚及黑梅貝，同樣用上陳年花雕酒醃製，賣相保持一貫精緻，前者醉鮑魚仲加咗少少花雕啫喱，非常有心思，口感柔韌得嚟富彈力，花雕酒香有強勁嘅餘韻；後者口感彈牙，底部肝臟味濃，微微酒香較為清爽俐落。

季節海產
日本生蠔嘅品眾實在多，這一款嚟自岩手縣嘅米崎蠔印象就第一次食，燒過之後仍然仲幾大隻，蠔肉屬爽身嘅一種，本身就已經幾濃蠔味，又燒鬼裙邊有焦脆感，再晌面頭加咗啲炸香咗嘅白飯魚仔同蔥花，味道就更有趣。

煙燻牛舌山椒燒
要選今晚嘅最佳菜式，小弟就一定投俾煙燻牛舌一票。首先，以木盒仍為盛器，一打開蓋，散發出陣陣由蘋果木做出嚟嘅煙燻香，極具視覺效果，而採用上牛舌心，加埋厚切，甚有彈牙感，不單有牛舌本身獨有嘅味道，仲有煙燻香、山椒味，實在色香味全而多層次。

旬燒魚配酸菜汁
可以講一道菜比一道菜精彩，輪到介紹呢個旬燒魚，賣相比較西式，但將魚皮起出嚟炸香後再插在煎魚之上，猶如揚帆出海，甚為立體，再者，片魚皮脆到不得了。而件煎魚以馬友一夜干入饌，魚味濃，煎得香口，肉質又嫩滑，伴上一小串紫蘇花，襯埋個酸菜汁，真喺中日西大融和，喺一道極具心思嘅菜式。

蝦濃湯冬陰功煮北海道帶子

煎帶子有咩特別呀？咪又喺心思囉，首先，用上北海道刺身級大大粒嘅帶子已好有睇頭，更將帶子肉、裙邊同內藏3個部位分開，可謂一雞三味，帶子肉爽口彈形，裙邊有份爽脆感，內藏軟腍粉香，配以呢個蝦濃湯冬陰功，勁鮮香蝦味，唔單止啲湯要一飲而盡唔好嘥，就連墊底好似粉絲嘅海藻麵亦唔好錯過。

牛肉壽喜燒配讚岐烏冬
就算喺日式套餐，近尾都會安排一道食事墊飽客人，關東風嘅牛肉壽喜燒鍋面鋪滿大量牛肉，色澤紅潤有雪花紋，加埋大大隻「月見」，未食先興奮。湯頭頗為清甜，牛肉嫩滑帶少少油香，而下面仲有好多配菜，包括豆腐、本菇、娃娃菜、洋蔥同蘿蔔，確喺豐富。最後，將烏冬放入湯中，吸收湯中精華，加上烏冬滑溜有咬口，讚呀！